Minister preocupa cu e situacion na Colegio Arubano

ORANJESTAD – “ Hopi preocupa mi ta, di loke mi a lesando y scuchando regardando Colegio Arubano”. Asina minister di enseñansa Michelle Hooyboer Winklaar a reacciona diamars mainta pa NoticiaCla.com. Un accion di e alumnonan awe mainta a causa e consternacion necesario serca e mandatario, mayornan y tambe otronan envolvi. “Mi lo ta pidiendo un reunion urgente cu e directiva (di e scol)”, e mandatario a sigui bisa.

MI ASUNTO

“Aunke formalmente y legalmente mi no por impone decision na Colegio, (pasobra e ta un fundacion priva) asina cu e ta cuminsa afecta calidad di educacion cu studiantenan ta ricibiendo, como minister e ta bira "mi asunto” e mandatario a sigui bisa. Como ehempel, e mandatario ta referi na un caso recien ora cu e mester a hiba Colegio Arubano su directiva corte pa resolve un asunto. “E no ta e situacion mas desea, pero e bienestar di e alumnonan y maestronan mester wordo salvaguardia semper”, Hooyboer a bisa. “Mi ta spera cu e directiva y e rector resolve e asunto mas liher cu ta posibel” e mandatario a finalisa bisando.

E ACCION

Alumnonan di Colegio Arubano Playa awe mainta trempan a bay den accion contra loke ta parse e actuacion di e rector nobo di e scol. For di ayera tabatin problema ora cu a bira conoci cu algun maestro, entre nan e popular mr (Alfredo) Capelo, lo a tuma nan retiro pasobra 'nan no ta di acuerdo cu e maneho nobo di e scol'. Reglanan nobo manera papia hulandes so den pauze, y un cantidad di regla mas, a pone cu algun maestro lo no a gusta. Ora cu a bira conoci cu Capelo tambe a entrega su retiro, e muchanan lo a rebeldia. Cos a bay asina leu cu hasta ex alumnonan di Colegio Aruba, a cuminsa mustra nan malcontento riba rednan social. Awe mainta alumnonan di scol a dicidi cu ta basta y nan a drenta den un tipo di accion, bistiendo paña di un cierto color y tambe sinta abou como protesta. 

UPDATE

Mientrastanto NoticiaCla.com a compronde cu cos a trankilisa bek na scol, unda cu e rector di e scol, lo a concedi na algun 'demanda' y of cambionan cu a pone cu e accion di e alumnonan por a termina. Ainda tin mas informacion na caminda.