Gielen: Tur cliente di Marketplace y Mall por parkeer libramente

ORANJESTAD – “Tur cliente di (Renaissance) Marketplace y Mall por parkeer libramente”. Asina e gerente general di e propiedad, Paul Gielen a confirma na NoticiaCla.com diamars mainta. El a reacciona riba e critica cu a bin for di dialuna ora cu e propiedad a sera e acceso regular na e lugar di parkeer, pa e parti patras di e Mall y hotel.

RASONAMENTO PA PARKEER

Segun Gielen, loke cu nan a haci ta cu tur empleado, esta di e hotel, e mall y e doñonan di tiendanan, mester haci uso di e espacionan di parkeer publico, pa sigura cu nan tin sufiente espacio pa nan clientenan (huesped di hotel y tambe di e mall). A remarca cu berdad ta dificil pa distingui ken ta huesped y ken no, y ken ta un cliente of un persona cu simplemente kier parkeer eynan. Pa awor, e compania lo acepta bo comentario y kere cu bo lo ta bisa do e berdad di bo intencion. “Den futuro, nos lo instala un sistema automatisa” Gielen a sigui bisa, pero no a bisa kico exactamente esey lo ensera.

E PROME DIA DI PARKEER PAGA

Tabata dialuna mainta cu centro di ciudad a lanta cu un concepto nobo, esta cu mester paga pa parkeer na mayoria posicion di parkeer. Como tal tur atencion  tabata den centro di ciudad pa wak con e proceso lo a cana di pagamento pa por parkeer. Manera ta conoci ayera a introduci e concepto, y manera por a spera, tabatin situacionan cu a presenta manera algun resistencia civil, mientras cu otronan si a cumpli cu e proceso di por parkeer. Notable ta cu hopi hende toch a opta ainda pa sea no drenta ciudad, of si nan drenta mes, no parkeer na e lugarnan disponibel. Esey a nifica cu hopi tabata e espacionan liber pa parkeer, cu pa un mainta normal, tabata hopi inusual. Mes momento, tabatin esnan cu a reta e proceso, den forma di desobediencia civil, unda cu nan a opta pa toch parkeer riba acera, siendo cu algun meter mas leu, tabatin espacio habri. Manera por a spera, nan a wordo atendi pa e parkeerwachternan y a haya un sticker geel di advertencia riba nan bentana di auto geplak. Loke tabata notable tambe ta e cantidad di persona cu ayera mainta ainda, tabata acudi na e oficina di Aruparking den Wilhelminastraat pa por sea cumpra nan permiso of simplemente haya informacion. E hecho cu awe tabatin entrenamento militar pa e apertura di aña parlamentario di mayan, pa cual mester a sera caya dilanti parlamento, no a yuda e situacion. 

PARKEO DI TURISTA

Den combersacion cu e vocero di Arubus/Aruparking Sanin Daou, e la confirma tambe cu enberdad mirando cu no tur espacio 'asigna' pa esnan cu tin permiso pa parkeer na nan lugarnan ey ta marca cu e strepi geel, a surgi algun caso unda cu turistanan a parkeer riba e sitio ey. A resolve e problema den forma di laga esnan parkeer den e zona sin problema, pendiente cu awe na final di dia, e liñanan geel tur lo keda cla awe si. A takel algun auto tambe y asina tin varios storia cu por relata den curso di dia. 

LEGALIDAD DI E COMPANIA

NoticiaCla.com su investigacion a mustra tambe cu mientras cu e leynan necesario a pasa pa por atende cu e asunto di parkeer, e compania mes cu ta opera e proceso di parkeer, esta Aruparking, no tin nan permiso comercial, esta nan 'vestigings vergunning' ainda. Pues inicialmente esey ta nifica cu nan no por opera legalmente ainda y consecuentemente multa hende. Pero segun e hefe di Arubus, Teo Croes, esaki no ta un problema y cu nan por opera sin problema. 

PARKEO NA HOTEL

E situacion cu a surgi ta cu entrante ayera, no por tabatin aceso sin mas na e lugar di parkeer di Renaissance. Como tal a cuminsa usa e boom pa frenta tur trafico, y controla kico tur nan ta bin haci. Esnan na e sitio y den operacion, a splica NoticiaCla.com cu e lugar patras di parkeer no ta sera, pero mas bien ta disponibel pa clientenan y turistanan di hotel. Si bo ta sea un turista residente di e hotel y of ta bay usa e facilidad di e propiedad, bo por drenta y parkeer.