Trahadonan di dept Social lo welga diamars

ORANJESTAD - Trahadornan di Departamento di Asuntonan Social (DAS) lo tene un welga solemne diamars 8 di september parti mainta como forma di demostra nan disgusto pa loke ta regarda introduccion di uso di parkeermeters den cercania di DAS. Asina nan ta informa den un comunicado. Segun e comunicado DAS su funcion y prioridad ta duna servicio na personanan cu diferente tipo di problemanan social manera entre otro Financiero, Bida & Famia, Legalmente vulnerabel y Guia Social.

STRUCTURA DAS

Segun e comunicado, DAS tin un fluho di ±80 cliente pa dia y mayoria di e servicionan aki ta rekeri mas cu un bishita na DAS. Actualmente e fluho di DAS na playa ta hopi mas grandi ya cu e Oficina pa Comunidad na San Nicolas ta cera pa motibo cu e la keda afgekeurd. Nan ta sigui mustra cu mester remarca cu clientenan di DAS, na banda di tin un entrada abou, hopi biaha ta depende riba un lift pa por yega DAS. E introduccion di Parkeermeters ta bay pone cu e lo bay bira mas dificil pa e cliente por yega DAS y esaki lo tin un efecto negativo riba e servicio.

META DI PARKEERMETER

E meta tras di e introduccion di parkeermeters den nos centro di ciudad no ta cuadra cu e doelstelling di DAS, segun e comunicado. Nan ta mustra cu DAS ta duna servicio na comunidad di Aruba y no ta un negoshi comercial. Trahadornan di DAS ta di pensamento cu no ta shop nan ta bay shop den playa, pero ta traha nan ta bay traha pa pueblo dunando un servicio di gobierno. Ademas e trahadornan ta haña cu nan merece un trato igual cu tur otro ambtenaar cu ta duna servicio na Pueblo di Aruba y no por ta asina cu un grupo di trahador publico so ta bay atras den salario. Ademas, no tin logica cu bo mes un dunador di trabou ta cobrabo pa parkeer.

CARTA PA MINISTER

Trahadornan a manda carta dia 1 di september pa Minister di Asunto Social, Hubentud y Labor sr. drs. Paul Croes y tambe a informa su sindicatonan TOPA y SEPPA. “Nos di Departamento di Asunto Social ta spera di por haña un solucion pa cu e asunto di parkeo aki mas pronto cu ta posibel na bienestar di e cliente y trahador pa asina por sigui brinda un servicio optimal na e pueblo di Aruba.” e comunicado ta finalisa bisando.