4 detenido di desturbio lo keda sera na KIA

ORANJESTAD - Tur 5 detenido relaciona cu e disturbionan di dia 27 di augustus a haya prolongacion di nan castigo, y a keda traslada pa KIA. Sinembargo, segun vocero di ministerio publico, Ann Angela, un di nan a wordo laga den libertad despues ya cu a 'suspende' su detencion. E persona ta I.I.L.  Pero e hecho ta, cu di 5 detenidonan cu a bay KIA awe, uno ta den libertad. 

PROLONGACION

Awe huez comisario ta dicidi si ta prolonga detencion di e 5 personanan deteni despues di e disturbionan di 27 di augustus ultimo. "E grupo di 5 ta deteni riba sospecho di a comete violencia riba e dia di iregularidadnan dilanti parlamento", vocero di ministerio publico Ann Angela a confirma na Noticiacla.com den fin di siman. 

PETICION PA PROLONGACION DETENCION

Manera NoticiaCla.com a raporta den fin di siman, ministerio publico a pidi pa prolongacion di e detencion di e 5 personanan deteni. Angela a confirma na NoticiaCla.com cu huez comisario lo dicidi dialuna si e ta prolonga e detencion aki realmente. E prolongacion, si aproba, lo por ta pa un 8 dia mas.

MOTIVACION PA PROLONGACION

Motivacion di fiscal pa pidi pa prolongacion, ta pasobra e ta ‘relaciona cu e seriedad di e hechonan di cual nan ta wordo sospecha y cu mester mas investigacion”. Riba esaki e huez comisario lo dicidi dialuna awor.

E SUSESO

Despues di e disturbionan diahuebs ultimo, polis a detene 12 persona inicialmente, y despues a laga 7 bay. A keda 5 persona cu si no a recobra nan libertad y ainda ta sera. Nan a haya dos dia di inverzekeringstelling y 8 di prolongacion di esey. Den nan caso, OM ta analisa cu nan a wordo deteni dia 28 (di augustus y a wordo ‘in verzekering gesteld riba dia 30 (di augustus). “Djey ta cuminsa core e 8 dianan, cu ta termina dia 7”.

PROTESTA Y CONCIENTISACION

Mientrastanto un grupo di simpatizantenan diahuebs atardi ultimo a cuminsa un tipo di ‘protesta’ y ‘concientisacion’ dilanti di Centro Di Husticia na Santa Cruz. Aki varios persona, incluyendo lider di MEP Evelyn Croes, a hiba discurso y a cuminsa pidi pa e libertad pa e grupo di persona aki, cu nan ta considera cu no por wordo teni deteni mas largo. NOTA: Foto ta di e anochi di disturbio di dia 27 di augustus ultimo. FOTO ta archivo di 27 di augustus ora cu polis a detene varios sospecho di e disturbio.