Awe ta cuminsa cobra pa parkeer na Aruba

ORANJESTAD – Entrante awe mainta, Aruparking ta cuminsa opera, cu ta nifica cu den centro di ciudad, riba posicionnan indica, ciudadanonan lo tin cu cuminsa paga pa parkeer. Segun Aruparking, ‘entrante dialuna e parkeo den centro di nos ciudad lo ta hopi mas miho organisa, treciendo cun'e hopi mas beneficio’. Den un comunicado, nan ta splica tur loke por y mester spera.

BENEFICIO DI PAGA PA PARKEER

Nan ta hasta duna ehempel, con, segun nan, lo tin beneficio di paga pa parkeer. Como ehempel, e compania ta duna, cu lo no tin auto nan para riba acera mas causando cu nos peaton nan mester baha y cana riba caminda pa por sigui cana bay nan destinacion. Tambe ta bay trece cu ne cu auto nan no por yega para unda cu ta mas y asina tambe stroba trafico di sigui core na su manera normal, ni tampoco pone cu caminda nan ta bira mas dificil pa maneha pasobra tin auto nan para net na e crusada of caminda no ta destina pa parkeo. Nan ta mire tambe cu comercio lo haya beneficionan grandi den benta, mirando cu awor en adelante tur trahadonan lo tin nan espacio di stacionamento destina pa parkeer vergunning houders, lagando asina e espacio adecua y mas cerca di e tiendanan pa e clientenan por disfruta di esaki.

ORIENTACION

Aruparking den nan comunicado a pidi pa tur hende orienta nan mes bon unda e espacionan pa staciona ta ubica pa evita cualkier mal entendimento. Entrante dialuna por staciona solamente unda ta marca. E areanan marca cu geel ta pa esunnan cu tin un parkeer vergunning y e espacionan marca na blanco ta destina pa e bishitantenan di centro di ciudad. Tin stacionamento marca na por ehempel Arubus, patras di ex Tivoli, na ex Texas, patras di La Moderna, tin banda di corte y patras di Botica Oduber. Tur tin nan mashin di Parkeer cu lo bo por deposita e tarifa dependiendo cuanto ora bo ta staciona bo vehiculo. No por staciona vehiculo riba acera of unda cu ta.

CUSTUMBRA

Ta compronde cu comunidad ainda lo mester custuma cu e cambio aki, pero mester regula stacionamento miho den centro di ciudad. Awe a yega e momento cu mester aplica e leynan stipula pa esaki. Ta hopi importante cu for di awe en adelante tur hende ta mas consciente unda por staciona nan vehiculo.

Tuma nota cu na e sitionan marca y cu tin parkeermeters, cu despues cu bo tempo caduca bo tin un tempo di 15 minuut pa recarga. Si den 15 minuut bo no a recarga, lo pone un klem na e auto. Esaki tin un multa di 75 florin cu ne. Si despues di 3 ora Aruparking no a ricibi un reaccion di e doño di e vehiculo lo pasa mesora pa takel e auto cu e costo adicional di 150 florin.

P'esey ta importante pa tur hende ta bon informa riba e cambionan, pa sa unda por staciona auto y unda no, pa evita cualkier inconveniencia. Pa mas informacion por tuma contacto cu Aruparking.