Enrique y Lionel a 'steal the show' na CNSJ 2015

WILLEMSTAD - Oficialmente diabierna e di 6 edicion di Curacao North Sea Jazz a ranca sali cu nombernan manera Charles Bradley, Cassandra Wilson, Gregory Porter, Emeli Sande y The Isle Brothers. Pero ta e artistanan Enrique Iglesias y Lionel Richie sigur ta esnan cu a hala mas hende atrobe diabierna anochi. E otro artistanan sigur a atrae nan siguidornan, considera como 'die hard fans', aunke den un volumen menos grandi. Algun di nan, aunke popular, no tabata kier e publicidad y a prohibi camara durante su presentacion. Retraso tambe tabatin e anochi aki, cu ta algo inusual pa e festival. E prome retraso tabata di Enrique Iglesias, sigui pa uno mas cortido pa Lionel Richie. The Isles Brothers a conoce un fayo tecnico durante su presentacion, cu despues a keda remedia. Fuera di e problemanan chikito ey, (den un organisacion grandi asina, esey ta wordo considera como problemitas), e anochi a cana sublime atrobe. 

ENRIQUE IGLESIAS

E retraso di Enrique Iglesias rapidamente a wordo lubida ora cu e la cuminsa cu su presentacion riba un velocidad halto. Su man visiblemente ainda afecta (mara cu un tipo di tape/ handschoen preto), y su petchi como su 'trademark', Iglesias a pone tur hende sapatia, grita y canta su exitonan un tras di otro. Drentando e publico, tabata loke a gana curason di e publico mesora. Dado momento a te hasta invita un persona di e publico, un hende homber, pa canta hunto cun'e. Despues algun fanatico a cuestiona pakico siendo un conocido 'hearthrob', e la opta pa un hende homber y no un hende muher, pero esey no a haci e presentacion menos bon. Tur su hitnan un tras di otro a zona, y tabata visto cu e anochi a pertenece na Enrique Iglesias. 

LIONEL RICHIE

Esun cu mester a sigui e escenario ey, tabata un otro grandi. Un veterano cu ya caba ta conoci pa esnan cu a yega di bishita e evento. Richie rapidamente a trankilisa tur hende, indicando cu 'mi ta bay canta tur cos. Di prome, awor, hasta The Commodores'. Esey a establece un patronchi cu e publico cu a tene tur hende trankil. Un tras di otro, su exitonan a cuminsa zona. For di 'Running With The Night", te na su 'All Night Long" y mas. Dado momento e la crea un impresion breve cu e lo a trece Diana Ross pa canta cune. Hendenan a keda keto keto pa wak si enberdad esey lo tabata e caso. Pero na final el a mustra cu "Diana no tabata por pasobra e mester a cushina, e mester a bay haci algo". Richie a demonstra atrobe, cu aunke cu su añanan ta persiguie, e tin e control di su stem, manera cu ta ayera. Y finalmente the Isla Brothers, a haya nan mes confronta cu un fayo chikito, pero cu unabes remedia, tabata manera nada no a pasa. Un publico atrobe, die hard fans, y otronan cu simplemente no tabata cla pa bay cas ainda, a aglomera dilanti e Sir Duke stage, y goza di e exitonan di e grupo legendario aki. Asina e anochi a yega na su final, habriendo caminda pa dos otro grandi, esta John Legend y Usher, y mei mei, nada menos cu Wyclef Jean y Pointer Sisters. Un otro anochi pa disfruta.