OM: Prolongacion di detencion pidi pa 5 detenido di disturbio

ORANJESTAD – Ministerio publico a pidi awe pa prolongacion di e detencion di e 5 personanan deteni, relaciona cu e disturbionan di siman pasa diahuebs. Vocero di OM, Ann Angela a confirma na NoticiaCla.com diabierna cu huez comisario lo dicidi dialuna si e ta prolonga e detencion aki realmente. E prolongacion, si aproba, lo por ta pa un 8 dia mas.

MOTIVACION PA PROLONGACION

Motivacion di fiscal pa pidi pa prolongacion, ta pasobra e ta ‘relaciona cu e seriedad di e hechonan di cual nan ta wordo sospecha y cu mester mas investigacion”. Riba esaki e huez comisario lo dicidi dialuna awor.

E SUSESO

Manera ta conoci, despues di e disturbionan diahuebs ultimo, polis a detene 12 persona inicialmente, y despues a laga 7 bay. A keda 5 persona cu si no a recobra nan libertad y ainda ta sera. Nan a haya dos dia di inverzekeringstelling y 8 di prolongacion di esey. Den nan caso, OM ta analisa cu nan a wordo deteni dia 28 (di augustus y a wordo ‘in verzekering gesteld riba dia 30 (di augustus). “Djey ta cuminsa core e 8 dianan, cu ta termina dia 7”.

PROTESTA Y CONCIENTISACION

Mientrastanto un grupo di simpatizantenan diahuebs atardi ultimo a cuminsa un tipo di ‘protesta’ y ‘concientisacion’ dilanti di Centro Di Husticia na Santa Cruz. Aki varios persona, incluyendo lider di MEP Evelyn Croes, a hiba discurso y a cuminsa pidi pa e libertad pa e grupo di persona aki, cu nan ta considera cu no por wordo teni deteni mas largo. Foto (for di facebook di Evelyn Wever Croes) ta di e momento di diahuebs ora cu un grupo di persona a bay dilanti di Centro di Husticia pa pidi pa libertad di e 5 detenidonan.