St Maarten a haya aanwijzing di gobierno di Reino

DEN HAAG – Conseho di minister di Reino den su prome session despues di reces a duna St Maarten un aanwijzing (instruccion) awe mainta, pa drecha e presupuesto 2015 y su proyeccionan financiero pluranual (meerjarenraming). Cu esaki conseho di minister di Reino ta sigui e conseho di College Financieel Toezicht Curacao y St Maarten (CFT) y ta confirma informacion di NoticiaCla.com y Antiliaans Dagblad cu a dicidi for di juli pa prepara e aanwijzing aki. Pues como tal, e no a bin como sorpresa. No ta conoci kico a dicidi riba Aruba, ya cu lo a dicidi e 'destino' tambe di Aruba awe durante e prome session. 

MEDIDA

Sint Maarten mester tuma medida pa reduci e pagonan atrasa di por lo menos 189 miyon, y pa compensa e deficit nan di e periodo 2015 pa 2018 di por lo menos 60 miyon florin. Tambe e isla mester compensa pa e gastonan na pensioen y cuido den un forma realistico den e presupuesto 2015, y tuma medida pa e cuido medico y e pensioen di biehez por ta sostenibel pa futuro.

MODIFICACION

E medidanan aki mester wordo poni den un modificacion presupuestario cu mester keda presenta prome cu 31 di october 2015. CFT lo determina e ora si e modificacion y e medidanan proponi ta suficiente. Pa por drecha e parti di cuido medico y pensioen di biehez gobierno ta haya te fin di 2016 pa cumpli.

MOTIVACION

Conseho di minister di Reino ta sinti cu ta necesario pa duna e aanwijzing (instruccion) awor. E ta splica cu St Maarten a haya amplio tempo pa tuma medida, pero no obstante promesa, no a cumpli. E aanwijzing tin como meta pa evita cu e problemanan financiero di St Maarten bira no manehable.