Oscar y Juanes a habri di 6 Curacao North Sea Jazz Festival!

WILLEMSTAD – Considera como e ‘ñapa’ di e evento principal, tur esnan presente diahuebs anochi pa e concierto ‘gratis’, no a disfruta menos cu e anochinan regular. Sigur no cu den e line up dos grandinan manera e conocido colombiano Juanes y e grandi di tur tempo den genero di musica salsa, e venezolano Oscar ‘d Leon. Cu un repertorio popular conoci, e publico a compaña e prome artista di anochi, Juanes, cu na varios momento tabata laga e publico mes dirigie. “La Camisa Negra” sinembargo tabata esun cu tur tabata warda p'e y no a keda defrauda. Na final, Juanes mesora a post un video di su experiencia na Corsou riba su pagina di instagram (cu tin 1.1 miyon siguido), cu e mensahe "Curazao, jamas tendre suficiente palabras para agradecerles esta noche, los quiero demaciado"

OSCAR

Despues a sigui e leon de la salsa, el don Corleone de la salsa y tur otro apodo cu por a pensa e anochi ey. Y ora cu e maestro di ceremonia Percy Pinedo a anuncia su presentacion, tur presente tabata sa cu un fiesta salsero nan lo a haya. Y nan no a keda defrauda. For di e prome tononan te na e ultimo, Oscar d’ Leon a mustra atrobe pakico e merece di wordo yama esun cu ta reemplaza e grandi Celia Cruz despues cu e gran dama a fayece algun tempo atras.

PUBLICO

Na tur, publico tabata grandi atrobe, y a mustra cu e anochi ‘ñapa’ ya caba a haya su aceptacion den un formato practicamente similar na e anochinan ‘regular’ cu ta cuminsa diabierna cu otro grandinan manera Enrique Iglesias y veterano Lionel Richie, y pa no lubida esun cu ta gara tur cu su tononan caribense europeo, Wyclef Jean. Manera e organisador/promotor , Don Gregory Elias a bisa NoticiaCla.com recientemente: “Pa tur hende tin algo!”. E aña aki, esey no ta diferente!