Tin 520 pasahero venezolano pega na Aruba diabierna anochi

ORANJESTAD – Un total di 520 pasahero venezolano (representando 5 buelo cancela) ta pega na Aruba diabierna anochi, debi cu Venezuela a sera e espacio aereo pa buelo di e.o. Aruba. Y pa fin di siman e situacion por yega na un cantidad di mas of menos 1500 pasahero cu tin cu bolbe nan pais sin cu nan por. Minister di Turismo Otmar Oduber ta encabesa un crisis centrum cu a keda lanta na oficina di Aruba Tourism Authority, cu ta monitoria e situacion y ta formulando un plan di accion. Segun e mandatario na NoticiaCla, a haci un apelacion na incorpora Cruz Cora y Arubus pa por yuda cu transporte y hospedaje na e shelter na Dakota. E responsabilidad ta keda pa e pasahero, ya cu e aerolinea ta mustra cu no ta un problema cu nan ta causa.

Pa por yuda pasaheronan di tur forma sinembargo, Oduber a pidi aeropuerto di Aruba keda habri 24 ora, pa si tin buelonan cu por yega via otro destinacion pa Aruba, cu pasaheronan venezolano, cu nan por haci esaki sin problema. Entre nan, tin e concierto di Romeo Santos cu tambe a confronta problema ora cu e avion di Santos no por a sali pa Aruba for di Venezuela. A usa e idea pa bula via Colombia pero no ta conoci si esaki a logra. Un grupo grandi di venezolano cu tabata poni pa yega Aruba pa e concierto, tambe a keda perhudica y ta purbando pa yega ainda.

Na aeropuerto mes, e situacion tabata basta caotico unda por lo menos 5 patruya cu polis tabata presente pa vigila e situacion pa e no bay for di man. Pasaheronan venezolano a papia cu NoticiaCla, pa indica cu nan a wordo avisa pa 6:30pm cu e buelonan a keda cancela. “Nos ta akinan for di 2’or pa check in, pero nos ta pega. E personal a bandona aeropuerto y nos ta nos so, sin placa sin nada” Jose Londonjo, un pasahero venezolano a bisa NoticiaCla. Y asina tabatin un cantidad di pasahero sinta tur caminda y otronan purbando di haya buelo. Un polis a splica NoticiaCla cu nan tabata den vertrekhal y unda cu un grupo chikito di pasahero no kier a bandona e sala.

Pa fin di siman, Oduber ta spera mas problema pasobra e ora tin un total di por lo menos 1500 pasahero cu ta pega na Aruba. Y no tin un idea kico por spera mirando cu no sa kico e presidente venezolano lo por haci den e proximo oranan. “Nos no sa si tin e capacidad na Rode Kruis pa acapara e situacion” Oduber a bisa. E situacion ta uno dificil, segun Oduber y ta purbando pa haci tur cos posibel pa remedia e situacion miho posibel.