Ley CAFT ta conta cu aprobacion di partido Red Democratico

ORANJESTAD – E siman aki e partido pafo di parlamento, esta Red Democratico a reacciona riba e ley cu recientemente a keda aproba, esta e ley di CAFT. “E ley di CAFT a keda aproba y ta conta cu aprobacion di Red Democratico” e partido a laga den nan comunicado e siman aki. Segun e partido, den statutonan di e partido, ora e partido a keda funda na 2003, ta para bon cla cu nan ta apoya control externo di Reino Hulandes pa garantiza bon maneho di placa di pueblo. Esey ta e esencia di CAFT. Si bo no tin nada di sconde bo ta habri pa control externo.

CONTROL PROFESIONAL INDEPENDIENTE

Y segun e comunicado, e control externo aki mester ta den man di profesionalnan cu ta independiente di politica. Esey ta otro pensamento clave di CAFT y di Red Democratico. For di inicio nos a boga pa profesionalnan no politico ta den gobernacion. Ta positivo cu no ta politiconan ta meti den CAFT sino profesionalnan financiero cu no ta of tabata vincula cu politica partidista.

STEMPEL PARLEMENT

Red Democratico a mustra tambe for di su prome salida cu na Aruba ta reina un stempelparlement y ta p'esey ta positivo cu CAFT ta kita poder for di parlamento. Si Parlamento di Aruba a demostra den 30 aña cu e no por controla gobierno, e ora un otro instancia mester haci e trabao necesario aki. Parlamento a perde su 'budgetrecht' pa su mesun culpa y awor ta necesario pa pone bao curatela.

PODER DJIES PA PODER

E partido ta sigui mustra cu poder djis pa poder no ta sirbi pa nada. “Poder mester sirbi un causa noble. E causa mas noble ta pa defende placa di pueblo. Placa di pueblo ta sagrado y CAFT su meta ta pa controla cu placa di pueblo ta wordo gasta di un forma responsabel. Gobernantenan a malgasta placa di pueblo y ta p'esey nos tin e debe astronomico aki. Wel ta bon mes pa kita e poder for di gobernantenan y pone den man di CAFT” e partido ta sigui bisa.

Red Democratico ta sigui mustra cu nan ta defende bienestar general y no autonomia. “Sigur e politiconan ta grita cu Hulanda ta viola nos sagrado autonomia cu tanto Betico y Shon Henny a lucha p'e. Autonomia riba su mes no tin balor, si bienestar general di pueblo ta wordo trapa. Si Aruba sink financieramente ta nos tur lo bira mas pober. P'esey nos ta apoya 100% e ley di CAFT”.

PATRIA Y PUEBLO

Segun e partido, patria y pueblo ta dos cos diferente. E politiconan y partidonan cu a y ta goberna Aruba ta semper dispuesto pa defende e patria, lesa interes di friends and family, pero dor di mal gobernacion ta trapa riba interes di pueblo. Nan tin boca yen di patria pero nan hechonan ta sofoca interes di pueblo. Autonomia di e pais no ta nifica nada riba su mes, loke si tin balor ta e autonomia di e ciudadano. Si e ciudadano tin un bida digno, tin pan riba mesa, por haya cuido medico di calidad, por haya educacion gratuito, eseynan tin balor. Y e autonomia di e ciudadano ta na peliger dor di e maneho financiero iresponsabel di nos gobernantenan for di 1986.

WELGA DI HAMBER

Red Democratico ta haya cu e partido AVP a bai den welga di hamber pa defende autonomia y hasta tabata dispuesto pa entrega nan bida con tal no bin supervision financiero di Reino hulandes. Awe AVP mester a traga e pildo di CAFT. MEP a hiba Hulanda e rapport 'Feestvierend ten onder gaan' y ta pidi intervencion di Hulanda y awe ta vota contra CAFT y ta contra control financiero. Tur dos partido a demostra cu nan ta oportunista. “Riba e punto aki Red Democratico a demostra di ta consecuente y ta un partido di principio, for di inicio di nos partido nos a pidi control financiero externo y p'esey awe nos ta apoya CAFT. Miembronan di Red Democratico cu orguyo por bisa: "nos ta orguyosamente parti di un partido cu no ta oportunista” e partido a finalisa bisando.