Con Gregory Elias ta midi exito of desapunto di Curacao North Sea Jazz

WILLEMSTAD – E forma con e doño, promotor y organisador di Curacao North Sea Jazz , Gregory Elias, ta analisa e festival tur aña y midi su exito, ta usando un forma simple y humano. “Ora cu mi ta mira cara di hendenan, -mi ta para di leu unda cu hende no ta mira mi nunca-, absorba con e bishitantenan ta reacciona y ta gosando”. Asina Elias den un entrevista exclusivo cu NoticiaCla.com ta bisa, riba con ta husga si e festival ta uno exitoso atrobe of no. “A base di e sonrisanan y e caranan contento y e ambiente, e ora bo por sinti cu e cos ta bayendo bon”. Esey ta un 'graadmeter' cu Elias ta uza pa por bisa cu ‘a score’.

LOGRO MAS GRANDI

Elias no por papia hopi di logro personal, pasobra e ta pensa cu esey otro hende tin cu papia p'e. “P'esey mi no ta gusta papia di logro”. E rapport di profesor Tico Croes ta esun cu por analisa e resultado y bisa si enberdad a logra e aña ey cu e festival. Hendenan mester wak di pafo, cu no tin interes particular, pa por bisa si e festival tabata un exito si of no. “E ta un hende cu ta haci su investigacion, uzando su hendenan di su universidad." Fuera di esey, Elias no ta confortable pa papia riba logronan di e festival.

FRACASO DI E FESTIVAL

Elias no kier papia di fracaso, pasobra cu e ta sinti cu e festival no tabatin fracaso, Elias ta contesta NoticiaCla.com. “Disappointment mi tabatin un biaha” Elias ta admiti. Esey a bin debi na situacionnan cu tiki hende a realisa nan mes ora cu Elias a bin cu e artista Prince, como un reemplazo di ultimo ora pa e cancelacion di e artista Usher (cu por cierto ta presenta e aña aki). E tabata un cancelacion literalmente di ultimo ora (tres siman prome) unda cu tantisimo menos hende a presenta e aña ey e concierto di Prince. “Te ainda e ambiente y e emocion musical y tur loke e meneer (Prince) aki ta representa, tabata un cos extraordinario. E tabata un disappointment cu no asina tanto hende (pasobra a cancela pa Usher) a experiencia e concierto di Prince." Y sigur si hendenan cu ta anda cu Prince y ta prepara su conciertonan bisa bo cu nunca nan no a wak algo semehante na Corsou, e ta haci Elias mas dolor cu hopi hende no a wak e concierto aki. Por lo menos, no mes hopi cu lo por y tabata capacita pa wak e. Esey ta e desapunto mas grandi te awor di Elias. “Un hende cu a duna 7 encore. Algo nunca bisto cu e la haci”. Elias ta considera esey como un desapunto mas bien priva, pero no como organisador.