Tur cos ta cla pa el Don Corleone de la Salsa Oscar d’ Leon

WILLEMSTAD – E prome anochi di Curacao North Sea Jazz ta cla pa ranca sali. Oficialmente e festival ta cuminsa diabierna dia 4 di september. Pero for di aña pasa cu a pone un dia ‘extra’ cu ta esun ‘gratis’ riba e diahuebs prome, e la bira casi mes importante cu e dianan ‘paga’. Y si mira e alienacion di diahuebs anochi (Juanes y Oscar d’ Leon), e peso ta practicamente mes halto cu e otro dianan.

LINEUP

Pa e organisado, doño y creador di Curacao North Sea Jazz esta Gregory Elias, e diahuebs a bira mes importante cu e demas dianan. Den e ultimo di un serie di articulo exclusivo deriva di un combersacion pa NoticiaCla.com, Elias ta papia di e line up di diahuebs anochi. Mientras cu tin tur elogio pa e artista Juanes, cu ta habri e festival di diahuebs anochi, Elias ta yama Oscar d’ Leon como ‘ El Bra bra’, ‘ el tigre’, el don Corleone de la salsa. “E homber mas grandi na bida ainda despues cu la Celia a muri, ta unico hende cu por bisa cu ta e ta esun di salsa, ta Oscar d’ Leon” Elias ta bisa.

AMIGONAN LA INDIA Y SERGIO GEORGE

Como nan ta amigonan personal di Elias, den e actuacion di Oscar d’ Leon ta bin tambe Sergio George cu ta toca, La India cu ta canta dos cantica apart den e presentacion di diahuebs, sigui pa Ismael de Miranda cu tambe ta canta dos cancion. “E show ey lo bira un espectaculo riba su mes” Elias ta sigura tur hende.