Maneho di cultura "Excelencia Cultural" presenta oficialmente

ORANJESTAD – E maneho di cultura "Excelencia Cultural" a keda presenta oficialmente diaranson mainta pa minister di Cultura Otmar Oduber. E mandatario ta comenta cu e ta un trabou di un aña y mey, di consulta den e area di cultura di aki na Aruba. "Esaki pa por a piki e pensamento di no solamente e sector publico, cu ta encarga cu e aspecto aki, pero di e sector priva tambe cu tin un rol hopi importante pa por carga e maneho cultural aki den futuro y logra tambe pa duna e sosten necesario cu e puntonan cu a bin dilanti den e cumbre."

12 PRIORIDAD

Den e cumbre a identifica 12 prioridad. Oduber a bisa "E tabata un escogencia di traha un documento completamente nobo a base di tur e investigacionnan cu a tuma luga den pasado caba, of crea un plan di maneho cu ta identifica e puntonan cu nos ta bay dedica riba dje. A prefera pa scoge un plan di maneho den e area di cultura, tumando den consideracion e investigacionnan cu a haci den pasado y a pone e 12 puntonan den un documento cu awor ta entrega na cada un di e stakeholders cu ta traha directamente cu Gobierno."