Seleccion futbol di Aruba ta sali diahuebs pa St Vincent & Grenadines

ORANJESTAD – E seleccion nacional di futbol di Aruba ta biaha rumbo pa St Vincent & the Grenadines diahuebs mainta, pa hunga nan proximo wega clasificatorio e siguiente dia, esta diabierna. Un total di 20 persona ta forma parti di e seleccion, di cual e entrenador Rini Coolen tin cu selecta e miho oncena pa diabierna. Esaki ta prome biaha cu e seleccion ta yega asina leu den e weganan clasificatorio.

E WEGA MES

Diahuebs mainta e seleccion ta biaha, y ta poni pa hunga nan wega pa 3’or y mei diabierna atardi den e stadion Amos Vale, na St Vincent. E siguiente wega ta bira dia 8 di september, na Aruba ora cu e wega ta anochi den stadion Guillermo Prospero Trinidad. Carchinan pa e wega ey ta na benta caba, y ta spera cu pa ora cu e fecha yega, nos por bisa cu e wega ta ‘sold out’. Aruba su chensnan t'ey, aunke e ta bay ta dificil. Asina mes e coach nobo a bisa recientemente. Hunto cu e wega di Aruba, Corsou ta topa (na Corsou) El Salvador pa 7’or y 5 minuut den stadion Ergilio Hato.

CHENS DI ARUBA

E entrenador nobo di seleccion di futbol di pais Aruba ta duna e ekipo 50-50 chens di gana e proximo partidonan su dilanti contra St Vincent & The Grenadines. “Si nos clasifica pa e proximo ronda, nos ta sigui papia” Rini Coolen a declara na prensa hulandes comienso di luna di augustus. Arubaanse Voetbal Bond a contrata e hulandes, -ex entrenador di FC Twente y actual hefe di e seccion hubenil di enseñansa di futbol hulandes-, pa guia e seleccion di Aruba proximamente. Su trabou sinembargo, ta pa apenas dos wega.

CONTRACTO DI COOLEN

E contracto ta pa Coolen ta pa e ta entrenado pa dos wega solamente. Djey e ta bolbe Hulanda. “E weganan ta dia 4 y 8 di september. Despues mi ta bolbe PEC (su trabou regular). Mi buelo di regreso ta geboekt caba” Coolen a sigura tur hende. Esaki pa no kere cu e ta bay keda e entrenador pa un periodo largo. Contrario na e suma grandi cu Corsou a paga pa su entrenado (ta varia entre 400 pa 500 mil florin segun informacionnan ricibi) Patrick Kluivert pa coach Corsou, AVB no a bisa cuanto e ta paga Coolen pa e ta coach pa ‘apenas’ e dos weganan aki.

CHENS PA GANA

Ta via e relacion di trabou entre PEC y AVB, nan a yega na e coach ‘nobo’ Coolen. E entrenador a bisa di tin e gana , pa yuda Aruba yega na e di 4 buelta. Nunca antes nan a yega leu asina den un pre clasificacion pa mundial. E sa si cu ta bay ta dos wega hopi dificil, y p'esey e chens di 50-50.