Comparacion di data DIMAS y SVB a revela ‘bypass’ di stranhero y negoshinan

ORANJESTAD – Mas di mil trahador stranhero y tambe hopi doño di negoshi na Aruba a ‘bypass’ e sistema di registro di Sociale Verzekerings Bank (SVB) cu a pone cu awe nan no ta sea registra como trahador y of e negoshi na unda ta labora no ta registra mes of ta existi den e registro di SVB. Directora di DIMAS, Kathy Ruiz Paskel a confirma esaki pa NoticiaCla.com diaranson.

COMPARACION DI DATA

Recientemente, segun Ruiz-Paskel, a tene un asina yama 'bestandsvergelijking' entre e data di permiso di estadia y trabou otorga pa DIMAS durante e periodo 2009-2013 y e data di trahadornan y empresanan di SVB. E resultado tabata uno unda a sali na cla practicanan "no corecto", unda cu a keda constata "by pass’ di e leynan di seguro social. SVB a base di e resultado ya a cuminsa pa tuma e pasonan necesario pa adresa e empresanan cu no a atene nan mes na locual ley ta prescribi.

RESULTADO PREOCUPANTE

Entre nan, a saca afor cu den un periodo di 5 aña, DIMAS a otorga un cantidad di 5.605 permiso di estadia y trabou, di cual 4.123 a registra conforme ley na SVB. E otronan, 1.482 cu tambe a haya un permiso di estadia y trabou, no a haci mescos. Esta cu den nan caso, nan no a pasa SVB pa registra nan mes. Cu esaki nan no ta aporta na e suma cu nan mester paga mensualmente na e fondo di SVB. E grupo aki ta 26.4% di e total cu a keda registra cu permiso y si a haci lo corecto. Tanto DIMAS como SVB ta considera esaki ‘preocupante’ segun e directora di DIMAS, pa cual hunto cu SVB, a dicidi cu nan ta introduci algun cambianan den e proceso.

CAMBIO PROCESO

Entre e cambio, a dicidi cu DIMAS lo cuminsa pone como rekisito, e copia di inscripcion di e trahado na SVB. Esaki lo por frena e problema. Pa loke ta e parti di doñonan di trabou, aki tambe mester bin cambio. Entre e posibilidadnan a pensa cu nan mester prueba cu nan a registra na SVB como doño di trabou.