Simar: Spera acuerdo cu minister riba managers EPI ta husto

ORANJESTAD – Den caso di e problema recien di e unit managers na EPI, sindicato di maestro Simar a reacciona diaranson anochi pa medio di un comunicado. Segun e sindicato, e minister actual encarga cu enseñansa, sra Michelle Hooyboer-Winklaar a sa di tuma un decision relaciona cu nan derecho y e compensacion di e managernan di EPI. Un compensacion cu pa 10 aña tabata pendiente, e sindicato ta sigui bisa. Minister Hooyboer di e forma aki ta reconoce e importancia di e trabou di e managernan y cu pa hopi aña no a haci nada pa mehora e compensacion husto y reconoce e derechonan como managernan di EPI.

STRUCTURA DI EPI

EPI ta conta cu cuater unidad y segun e organograma original, conforme e plan strategico, cada unidad mester funciona cu 3 manager. 2 manager ta encarga cu contenido di enseñansa y un cu e guia di studiante. Lamentablemente, -segun e sindicato-, na 3 unidad actualmente esaki no ta e caso, y ta operando cu solamente 2 manager cu tur e consecuencianan cu esaki ta trece cun'e pa e proceso di enseñansa. “ A comprende cu di un manera of otro lo kier reduci managers na EPI, siendo cu e institucion aki den un principio a wordo traha pa 1200 studiante y cada unidad lo mester funciona optimalmente cu 3 manager” e comunicado ta sigui bisa. Segun e sindicato, atrabes di añanan EPI a keda crece y na e momento aki ta conta cu alrededor di 1800 studiante. “ Pues no por compronde cu kier reduci e cantidad di managers siendo cu awo tin mas studiante na tur e unidadnan”. Segun Simar, interesante ta pa para keto y reflecciona ariba kico e hecho cu actualmente tres di e cuater unidadnan tin solamente 2 manager hasiendo e trabou di 3. Esaki ta un presion enorme y inhusto riba 2 persona cu ta haciendo trabou di 3 persona sin ricibi ningun tipo di compensacion adicional tampoco. Esaki ta nifica un peso di trabou y responsabilidad cu inicialmente 3 hende lo mester a carga. Y asina mes e managernan a mustra e amor y compromiso pa nan trabou dor di presenta tur dia y duna lo mihor di nan mes pa e scol y e lesnan por sigui.

PROCESO DI RENOBACION

EPI ta den proceso di renobacion grandi den e sistema di educacion. Sinembargo mester percura pa continuidad di e programanan actual pa por lo menos cinco aña mas. Ainda tin hopi otro aspecto cu tin mester di atencion urgente, manera mehora transicion di graduadonan di MAVO y EPB pa EPI, formacion continuo pa docentenan di EPI, mehoracion di condicionnan di trabou, compensacion di docentenan y inversion den ekipo moderno. Esakinan ta forma parti di e lista di puntonan di atencion presenta na e ultimo tres ministernan di enseñansa. Segun e sindicato, ta e deseo di e managernan concerni pa EPI tambe conoce un desaroyo duradero y sostenibel. Esaki ta encera entre otro haci un evaluacion profundo di e proceso di desaroyo, e nificacion di Educacion Vocacional pa Aruba y e funcionamento di EPI como institucion pa prepara alumnonan. Primeramente mester formula un vision kico ta e funcion di enseñansa profesional na Aruba.

SERA CAPITULO

E managernan, mescos cu e Minister segun Simar, ta desea di sera e capitulo aki cu pa hopi aña ta conoci como un ‘unfinished business’. Di e forma aki tambe nan ta expresa nan compromiso continuo cu EPI y Aruba pa sigui brinda e mihor di nan mes na bienestar di educacion profesional intermedio. No mester lubida cu ta hunto mester construi un dushi Aruba.

Despues cu Simar, den representacion di e managernan, a sinta na mesa hunto cu e instancianan concerni y bureau minister a logra yega na un entendimento cu cosnan no por a sigui asina mas. “Nos ta lamenta si cu niun dia minister mes a atende cu e sindicato y e managernan. Awo Minister Hooyboer-Winklaar a reconoce cu cosnan a bay robes cu e derecho di reconocimiento di trabou y compensacion husto di e managernan pa por lo menos e ultimo 10 aña y a trece un proposicion inicial pa sera e capitulo aki. Simar a pidi tempo pa por studia e proposicion asina cu ricibi esaki por escrito y lo duna mas pronto cu ta posibel un reaccion y nan contesta riba esaki.

Simar ta spera cu e propuesta, di parti minister Hooyboer-Winklaar, ta uno cu berdaderamente ta reconoce e trabou inbaluable di e managernan y lo ta e compensacion husto pa nan trabou.