Antologia Cucuisa Cabisha

ORANJESTAD - Diadomingo dia 13 di september lo tin un atardi literario den Podium Mozaiek, unda cu tradicionalmente e Cas Editorial In de Knipscheer lo lansa su bukinan nobo pa e aña aki. Durante e atardi aki lo tin presentacion di 8 buki nobo di autornan Caribense. Un di nan lo ta di e autor Arubiano Quito Nicolaas, kende lo presenta un seleccion di su poesianan den e antalogia Cucuisa Cabisha/Als de aloë sluimert.

ANTOLOGIA

E antologia a bira un volumen cu ta trata e cambionan cultural, esnan den comunidad y nos forma di pensa y actua. Nicolaas a publica te awor tres novela, un buki di storianan cortico y seis tomo di poesia. Cu un cantidad di 1800 paginas scirbi, el a duna un aporte grandi na Literatura Arubiano y Caribense. Esaki ta sin conta su articulonan, ensayonan y texto di su charlanan cu el a publica na Aruba y den exterior. Cu e hecho aki Quito Nicolaas ta ser considera como un di e escritornan mas importante di siglo 21.

POESIANAN

Aña pasa ora e traductor Fred de Haas a acerca e autor cu e idea pa traduci su poesianan, esaki tabata un sorpresa pa su persona. E proceso a cuminsa cu selecta un cantidad di su poesianan cu ta forma parti di un cuadra. Despues a sigui e fase pa acorda e traduccion realisa. E locual cu a tuma mas tempo ta e preguntanan cu e autor mester a contesta pa asina por a traha e notanan di informacion cu mester duna un splicacion mas amplio di nos historia.

CARACTERISTICA

´E característica excepcional di e seleccion di e poesianan aki ta cu e lector ta haya sa algo mas di e historia, cultura y forma di biba di un pueblo Caribense, kende apesar ta conecta cu e espirito di Europa, no facilmente ta haya conexion cu e manera di pensa y actua Europeo´, segun Quito Nicolaas den e prefacio di e buki. Esaki lo ta e di 11 obra literario cu e autor ta contribui na Literatura Arubiano y Caribense. Pa e Cas editorial In de Knipscheer esaki ta e prome antologia di e magnitud aki cu nan ta publica.