Conmocion pa cobransa cash durante buelonan venezolano pa Aruba

CARACAS – E aerolinea venezolano Avior a informa cu nan ta cobrando e 10 dollar di impuesto ‘los’, enves di incluy’e den e pasashi, pasobra ‘autoridad ta exigi cu e pago mester tuma lugar den dollar’. Segun e aerolinea, prome tabata enberdad parti di gasto di un pasashi, y cu e medida ey a wordo anuncia pa e aerolinea y agencianan di biahe for di luna di mei. Problema ta cu un pasahero recientemente a tuma nota di esaki y a film’e y pone riba internet.

VIDEO DI SUCESO

Tabata e video di loke parse un dama Latino papiando ingles, cu tabata den un avion di Avior biahando pa Aruba. E tabata nara e storia segun e tabata filma e pasaheronan den e avion, y mirando con e stewardessnan tabata cobra pasaheronan placa cash. E video aki a circula rapidamente riba internet via rednan social. Un conmocion pa pago di 10 dollar extra.

SITUACION STRAÑO

Pa e dama, esaki tabata algo ‘straño’. “Mi a biaha rond di mundo y ta prome biaha cu mi ta wak algo asina den avion. Hendenan cu tin cu paga 10 dollar cash den avion!. Y ta supone cu esaki ta solamente pa venezolanonan!. Ademas e dama tabata indica cu segun su informacion, si e pasahero no por a paga e 10 dollar, e mester a bolbe Valencia, unda cu e buelo a origina.

REACCION GOBIERNO

Gobierno di Aruba mesora a reacciona indicando cu e cobransa aki ta sosode for di 2012, pero inclui den e pasashi y ta valido pa tur buelo for di Venezuela pa Aruba. Pero na 2015, aerolineanan venezolano cu no tin acceso na divisas, a cuminsa cobra e pasaheronan esaki ‘cash’. Wak e video aki.