Droga den maleta riba buelo di Aruba pa Republica Dominicana

SANTO DOMINGO – E aerolinea PAWA Dominicana a informa cu nan ta colaborando cu autoridad dominicano pa facilidad e investigacion riba e caso di maletanan cu droga procedente for di Aruba. Ta trata di 3 maleta cu a yega abordo di un buelo for di Aruba. Asina e portal dominicano ‘Listindiario.com” ta raporta.

MALETANAN CU DROGA

Ta trata di tres maleta cu droga, cu a bin riba buelo 710, procedente di Aruba, cu tabata pisa 50 liber. Segun e informacion, e maletanan a wordo registra pa personal di seguridad di aeropuerto di Aruba, segun e protocol regular. “Esey a inclui verificacion via machinan Xray, prome cu e maletanan a subi avion.

FALTA MALETA

Ora cu e avion tabata riba suelo dominicano, e maletanan a wordo saca di e avion, y traslada pa e area di inspeccion di duana, unda cu a pone nan riba e ‘belt’ pa pasaheronan por haya nan. Ta eynan e pasahero cu a registra e maletanan na Aruba, a bay cu solamente dos maleta, y laga uno atras.

INVESTIGACION RIBA MALETA

Mas despues e maleta a wordo reclama pa un trahado di AILA, cu a presenta na e oficina di PAWA, unda cu e empleadonan di PAWA a solicita presencia di personal di seguridad specialisa di aeropuerto (CESAC), pa investiga e contenido di e maleta. E investigacion a revela cu e maleta tabata contene substancia sospechoso, parecido na cocaina, pa cual PAWA mesora a suministra e informacion di pasahero y ta colaborando cu autoridad pa haya e pasahero bek. Como tal PAWA kier mustra asina cu no ta nan fayo, sino mas bien un pasahero cu a purba burla di e situacion. E aerolinea recientemente a inaugura su prome buelo pa Aruba.