Lopez: E pakico verf parlamento tambe y no solamente drecha bentana

ORANJESTAD – A opta pa verf e edificio di parlamento tambe, y no solamente drecha porta y bentana. Presidente di parlamento Marisol Lopez Tromp a splica NoticiaCla.com diamars anochi e motibo. “E lugar a keda destrosa. No ta e 60 y pico bentana cu porta so a kibra” Lopez a purba splica e website aki. “Loke a pasa cu Staten, nunca antes a sosode. A dicidi a base di adviezen di ultimo añanan di entre otro DOW, CEA, infrateam etc, pa drecha staten bek” Lopez a sigui bisa. Den cuadro di esey, a traha un ‘werkplan’ cu ta contene diferente tipo di trabou. Entre nan e parti di verf. Ademas, otro siman ta apertura di aña parlamentario, y mester percura pa e edificio ta den un estado representativo. Riba e pregunta di e gastonan monta na esaki, NoticiaCla.com no a haya contesta. E pregunta a surgi ayera ora cu diripiente por a mira cu hendenan a cuminsa verf e edificio tambe y no solamente pasa pa drecha e partinan di bentana y porta kibra. 

PARLAMENTO DESTROSA

Tabata siman pasa ainda cu presidente di parlamento a relata riba e forma con e edificio a keda despues di e disturbionan di siman pasa diahuebs. “Parlamento a keda practicamente destrosa”. Asina presidente di parlamento Marisol Lopez Tromp a describi e situacion di e edificio un dia despues di e disturbionan violento di diahuebs anochi. Un total di 25 bentana (y porta) kibra, daño di candela, menasa personal contra su persona y famia, y mas. Tur esaki ta cosnan cu e presidente a resumi durante un conferencia di prensa diabierna, unda cu e la duna detayes di tur loke a sosode un dia prome.

DESTRUCCION GRANDI

Mientras cu henter dia tabatin movecion, tension, y cierto destruccion, Lopez a mustra cu e destruccion mas grandi a bin despues di votamento di e ley di colegio di supervision. Ta ora cu e reunion a caba, ta cu e daño mas grandi a tuma lugar. Lopez a mustra tambe cu tin indicacion serio cu e ‘meta tabata pa drenta parlamento y ocupa e sala di parlamento’. Algo cu e grupo di manifestante no a logra.

DAÑO FINANCIERO

E daño financiero no ta conoci ainda, y ta awe den dia a cuminsa acesora e situacion y calcula cuanto e daño ta. Loke Lopez a recorda esnan cu a haci e daño tambe, ta cu e daño ta sali for di e mesun saco di e pueblo pagado di belasting, pues ta nan mes nan a haci daño door di causa destruccion, y consecuentemente causa mas gasto pa parlamento. “Awor nan ta bezig cu esey” Lopez a bisa NoticiaCla.com, refiriendo na e calculacion di daño material.