Lider di MEP a entrega keho contra presidente parlamento

ORANJESTAD – Manera anticipa, lider di fraccion di partido MEP a entrega un keho contra presidente di parlamento Marisol Lopez Tromp na ministerio publico diamars ultimo. Den un carta, -cu NoticiaCla.com tin den su poder-, dirigi na procurador general van Erve, Wever ta pidi’ e pa inicia un investigacion contra Lopez, pa motibo cu durante e reunion publico recien ora a trata ley di CAFT, cu sea intencionalmente of no, Lopez a pone bida di Wever na peliger.

CARTA

Den e carta di tres pagina, Wever ta relata un 13 pa 14 punto di cosnan cu a sosode durante curso di dia ey, algun den detayes, pa duna un bista con tur cos a bay. Na final, e ta pidi van Erve pa inicia e investigacion contra Lopez. E motibo specifico, -segun Wever den e carta-, ta cu Lopez lo a laga personanan arma, intencionalmente, permiti entrada den parlamento durante e reunion. Y ora cu Wever a pidi Lopez pa actua contra esaki, Lopez lo no a reacciona. Ademas Lopez lo no a haci uso di polisnan presente, pa saca e personanan ‘arma’ aki for di e sala.

GRABA REUNION

Tambe Wever ta mustra riba e hecho cu e tin informacion cu e reunion no a wordo graba tampoco. Sea cu ta intencional of no, e ta cuestiona e hecho aki y ta sugeri cu posiblemente e motibo por ta pasobra no lo kier a mustra e personanan aki den e sala. Tambe ta cuestiona cu no a transmiti varios parti di e reunion, siendo cu a pidi e presidente di parlamento pa para esaki.

REACCION

NoticiaCla.com ta pendiente un reaccion di presidente di parlamento Marisol Lopez Tromp awe. Lesa e carta aki den tres parti. A, B y C.