No a keda cla pa entrega presupuesto 2016/17 na tempo

ORANJESTAD - E presupuesto(nan) di pais Aruba pa 2016/17 no a keda entrega dia 1 di september na parlamento manera cu ley ta stipula. Inicialmente (manera cu NoticiaCla.com a raporta caba) e intencion tabata pa esaki tuma lugar dia 1, pero pa motibo di tardansa primordialmente na departamento di finanzas, esaki no a logra. "Nos ta wardando riba dir(ector di) fin(ansas)" minister di finanzas Angel Bermudez a sigura NoticiaCla.com na comienso di dia. tambe NoticiaCla.com a reproduci e carta cu e tin den su poder, di presidente di parlamento Marisol Lopez Tromp cu ta puntra e mandatario kico e status di e presupuesto ta. Tabatin speransa cu esaki lo por a keda entrega na tempo ainda. Pero na final, NoticiaCla.com a compronde cu e presupuesto lo por wordo entrega mas tempran, mitar di e luna aki y mas tarda fin di e luna. Como tal un biaha mas no ta cumpli cu e palabracion haci, esta pa entrega esaki dia 1 di september. No por culpa gobierno completamente, segun minister Bermudez, debi cu tin yen di factor cu a pone cu dificilmente por a keda cla. 

INTENCION TABATEY

Tabata dos siman pasa ainda cu NoticiaCla.com tabatin contacto cu e mandatario di finanza riba e topico aki, unda cu a raporta esaki tambe. “Gobierno ta trahando duro (riba presupuesto 2016/2017) minister di finanza Angel Bermudez a sigura NoticiaCla.com e tempo ey, bisando tambe cu 'e team ta trahando duro, y ta spera cu nan ta keda cla cu e presupuesto (nan) pa por entrega (nan) pa 1 september, cu ta e fecha oficial cu mester entrega presupuesto tur aña'. Notable ta cu enves di solamente un presupuesto, tabata kier entrega 2. Riba e pregunta cu si lo a logra ambos, e mandatario a bisa “esey ta e idea”.

TEMPO CORTO Y CFT

E tempo ey a mustra tambe cu tabata falta menos cu dos siman pa 1 di september, pues e tempo no tabata mucho mas pa keda cla cu e dos presupuestonan. E intencion di dos presupuesto, ta segun palabracion haci anteriormente, aunke cu den un conseho anterior di College Financieel Toezicht (CFT) na gobierno di Aruba, a sugeri pa ‘deshaci di e idea aki, mirando cu no ta kere cu ta bay logra”. Esaki mirando e retraso cu tabatin cu otro asuntonan. Como tal a sugeri pa ‘leumai’ esey y traha mas duro riba e asuntonan ‘mas urgente’ manera e ley di AFT y otro leynan cu mester a wordo implementa cu mester a genera placa den caha di gobierno.

CONSEHO CFT

Durante un conseho di CFT di 4 di juni ultimo (lesa e pida di e conseho aki), nan ta bisa specificamente, cu mirando e tempo cu ta falta pa 1 september, ta keda 3 luna di tempo. Di esey, ainda mester duna Raad van Advies e tempo pa repasa esaki. Pues de hecho, ta apenas 2 luna tin pa traha y keda cla cu e presupuesto. Y si enberdad gobierno kier logra pasa dos presupuesto, of uno valido pa dos aña, mester cambia un landsbesluit. Algo cu segun CFT, nan no ta mira cu lo por keda cla. P'esey nan a sugeri pa gobierno deshaci di e pensamento aki.

PREROGATIVO GOBIERNO

Gobierno sinembargo a mustra cu nan ta sigui cu e plan toch di entrega 2 presupuesto e aña aki, y tambe riba e fecha cu pa ley e mester wordo entrega. De hecho, un di e ‘consehonan’ di CFT recientemente tambe tabata, pa percura pa uza (e tempo ey tabata falta dos luna ainda) e tempo pa enfoca full riba esey, y sigura cu e presupuesto keda entrega na tempo.

PRESUPUESTO LAAT

Den pasado presupuestonan a keda entrega ‘laat’, y a duna como ‘motibo’ cu mester a implementa varios decision y cambio basa riba resultado di reunionnan cu gremio. Calculacion di e cambionan a tuma tempo y como tal no por a entrega e presupuesto sin e cambionan sino e lo tabata ‘irealistico’.

MEDIDANAN INCLUI

No ta conoci pa NoticiaCla.com si e presupuesto di 2016/2017 ta inclui e medidanan anuncia (entre nan e lista di 24), y te con leu esaki ta factibel pa cumpli cune ainda.