Aruba Short Film Festival 2015 dedica na Faritah Luidens y Vale Croes dfm

ORANJESTAD - Diabierna 4 di September 2015 ta tuma lugar e Segundo edicion di ARUBA SHORT FILM FESTIVAL. Un y tur ta ser spera 7:30 na Cas di Cultura unda cu pa 8:00 lo duna inicio na e festival di pelicula cortometrahe 2015. Un total di 7 pelicula lo ta compitiendo pa e premionan di miho actris, miho actor, miho editing, publieksprijs y miho pelicula cortometrahe 2015. Lo tin dos categoria cu ta esun di hubentud y esun di adulto. Den cada categoria lo saca e premionan ariba menciona.

E peliculanan compitiendo lo ta: Awo y pa semper (Lyrick Perez), Sin rastro (Gabriela Croes), Aruba Breeze (Anton Jacobs), Negligencia (Cedric Gei), Heartbreak (Lislaine Bermudez), Dina (Luty Martinez) y Tanto bal (Lislaine Bermudez). Ademas lo ser presenta e pelicula cortometrahe titula “E BERGUENSA” dirigi pa Desiree Croes y como actornan principal Lelicia Tromp y Addonsito Croes.

E comision organizador cu ta cay bao fundacion BEREA a dicidi cu e festival di pelicula cortometrahe lo ser dedica na dos baluarte cu e hunga un rol importante den e mundo di actuacion na Aruba. Un di nan no ta cu nos mas y ta nos orguyo Vale Croes dfm . E di dos cu ta ser honra ta e orguyo nacional sra. Faritah Luidens cu tin un trayectoria largo den actuacion. Ta ser pidi pa tur hende ta na tempo pa asina no perde e inicio di e festival cu ta start 8:00 pm. Comision a informa cu a keda algun ticket mas y por bishita e pagina riba Facebook di Aruba Short Film Festival. Tambe por yama 5602626 despues di orario di trabao pa mas informacion.