Aruba Airport Authority y su partnernan a saca ganadonan di Buy2Fly

ORANJESTAD - Aruba Airport Authority N.V. (AAA) dialuna a saca e ganadonan di e campaña pa turista y local cu a tuma luga entre dia 1 di juni 2015 pa dia 31 di augustus 2015. Tabatin mas 10 mil ticket entre clientenan di tur tienda y negoshinan di cuminda y bebida situa den Aeropuerto Internacional Reina Beatrix.

PROME BIAHA

Ta pa prome biaha cu a organisa un tipo di campaña asina y a program’e pa tuma luga den e lunanan di vakantie grandi, ora cu tin hopi pasahero local y internacional combina.

Cu cada compra di 20 dollar a invita e cliente pa yena un ticket y asina ofrece nan un chens pa gana cu e campaña Buy2Fly.

E regla principal tabata cu si un persona local gana, AAA ta regal’e 2 pasashi pa e destinacion cu e tabata biahando dia cu el a haci compra na aeropuerto y si un turista gana, AAA ta regal’e 2 pasashi for di e destinacion cu e la bin pasa vakantie na Aruba.

GANADORNAN

Marc Figaroa, kende ta "Head of commerce" na AAA a anuncia como e ganadonan Yahaira Pinzon de Cicer di Caracas, Venezuela y Kim Rinaldi di New York, N.Y. Tur dos a keda hopi soprendi ora cu nan a ricibi e yamada cu e invitacion pa bolbe Aruba.

DUFRY

Di parti di Dufry, manager Diomira Tromp a expresa cu e campaña tabata exitoso y Dufry ta hopi contento tambe cu e hecho cu ta un di nan clientenan a gana un pasashi pa bishita Aruba un biaha mas. El a splica cu e campaña tabata un experiencia unico pa Dufry, como cu nan no sa tin campañanan asina na aeropuerto y e tabata un oportunidad tambe pa e personal di e tiendanan interactua un poco mas cu clientenan.

SIGUIENTE CAMPAÑA

Marc Figaroa a agrega cu AAA ta preparando caba pa un siguiente campaña hunto cu nan partnernan Dufry Aruba, De Wit & Van Dorp, Colombian Emeralds International, Kok Optica y e outletnan di cuminda y bebida di One Happy Bar y AHI.

AAA ta gradici tur su partnernan pa e bon cooperacion y ta avisa tur pasahero pa keda pendiente pa e siguiente campaña, cu lo tuma luga den e temporada di fin di aña.