Otro siman Aruba ta conoce e concepto di 'paga pa parkeer'

ORANJESTAD - Entrante otro siman dialuna (manera cu NoticiaCla.com a raporta mas prome), Aruba ta conoce e concepto di paga pa parkeer. E prome fase lo ta den centro di Oranjestad, y despues lo inicia cu esaki tambe den e area di hotelnan. Loke esaki ta nifica ta cu entrante otro siman dialuna, for di 7or di mainta te 7'or di anochi,  un area completo di Oranjestad lo ta cubri cu espacio special numera pa parkeer, unda cu automobilistanan, -contra pago-, ta haya derecho pa parkeer nan auto, sin problema. E compania AruPark a emplea 16 persona conoci como parkeerwachters, cu lo vigila e teritorio, y sigura cu tur cos ta marcha bon. E intencion tras di e concepto di parkeermeter, ta pa genera fondo extra pa Arubus (compania madre di AruPark), y cu poco poco gobierno por reduci su subsidio anualmente te na un nivel hopi mas abou cu e ta awor. 

CONCIENTISACION

AruPark a inicia mesora cu un campaña di concientisacion, pa mas bien educa tur usuario y pa ora cu e fecha yega, tur hende ta informa, di con tur cos lo funciona. A pensa riba practicamente tur posibel scenario, pa garantisa cu e proceso por cana mas suave posibel. AruPark su hefenan ta conciente cu e lo por crea resistencia na comienso, y cu lo por tin e asina yama 'kinderziektes'. Pero na caminda nan lo por drecha esaki. E loke cu e usuario tin cu sa, ta cu e mester tin placa los (no placa di papel) pa por usa e machinan, of uso di un smardcard (un carchi estilo creditcard, cu ta carga cu placa). Tambe e persona mester sa cu e ta paga pa cierto ora di uso, y cu terminacion di esaki den un forma no corecto, por resulta den multa. P.e. ora un persona paga pa un ora, pero laga su auto mas largo para, e lo haya un klem na su auto, cu ta strobe di move. E tin 3 ora pa paga e multa, y e klem lo wordo kita. Si e no haci esaki, autoridad tin e derecho di takel su auto, y esaki lo tin cu costa e usuario mas placa ainda. 

MAS INFORMACION

Den proximo dianan, lo tin mas informacion riba e proceso y detayes specifico, di kico tur tin cu haci, por haci y por ta e consecuencianan si no tene nan mes na e reglanan di parkeer. Tambe tin beneficio pa esnan cu parkeer corectamente. Esnan cu ta trahado den centro di ciudad, enberdad ta haya nan mes ta paga un suma mensual pa por parkeer nan auto, pero mes momento e ta garantisa cu nan tin un espacio sigura, serca di nan trabou. E buscamento, perdemento di tempo, awor lo ta pa pasado, segun e compania a sigura durante un conferencia di prensa.