Luis Oduber creciendo den e funcion ‘nobo’ di director di WEB

ORANJESTAD – E contracto pa ta director statutair interino na WEB Aruba NV, no ta mara na fecha. Por lo menos no esun di Luis Oduber, cu desde 2 luna y mei, por yama su mes e hefe grandi di e compania cu ta produci awa potable na Aruba. “Nan a pidi mi pa tuma rienda di e compania te ora cu bin un decision final” Oduber a splica NoticiaCla.com. Un veterano di 14 aña na WEB, Oduber ta bon conoci pa e compania y e trabou tecnico. E mes a keda sorprendi cu e ‘challenge’ nobo aki, y tin tur intencion di duna su maximo. Y si e oportunidad bin pa e tuma e funcion den un caracter mas definitivo, e kier ‘bay pe’.

META COMO DIRECTOR

Na momento cu NoticiaCla.com a papia cu Oduber, e tin mas of menos 3 luna den e funcion. Un funcion cu e la haya riba dje, ora cu doño di WEB, esta Utilities a manda e director Oslin Boekhoudt cas. Mientras cu e no a haya ningun ‘orden special’ pa cumpli cune, e meta principal ta pa ‘sigui locual nos tabata bezig cune’. E la tuma Oduber algun dia pa familiarisa su mes cu e parti ‘desconoci’ di e trabou, pero despues hunto cu e ‘team’, ta trahando riba e caminda cu tin aworaki.

CHALLENGE NOBO

Mientras cu e trabou ta uno pa un periodo ‘temporal’, ora cu yega asina leu pa busca un director ‘fiho’, Oduber ta kere cu e ta cla pa e reto. “Berdad na cuminsamento tabatin hopi cos nobo, pero mi a cuminsa custumbra cun'ele y e ta un challenge nobo den mi carera” Oduber ta bisa cu un cara di confiansa y logro. Siendo un veterano di 14 aña na e compania, e la maneha varios faceta den e compania. “Directeurschap ta algo interesante y mi ta kere cu mi lo haci un bon trabou den esey tambe”.

CURICULO

Prome cu e la bira director, Oduber tabatin varios funcion. E la cuminsa como ingeniero tecnico, bira hoofd di e departamento, manager, yuda e parti di distribucion di awa, y recientemente (2015) e la wordo pidi pa yuda den e departamento di mantencion, te ora cu e la wordo pidi pa bira e director temporal di WEB. Su estudio ta di ingeniero electrico, pero e la traha prome tambe 12 aña na refineria den maneho di departamento di mantencion etc. Pues Oduber tin un trayectoria largo su tras, cu ta dun'e e confiansa pa asumi su tarea ‘nobo’, y si cos cana bon p'e, lo e ta ambiciona pa bira e director riba un forma mas ‘permanente’.