Na october WEB lo cuminsa cumpra gas for di EcoGas

ORANJESTAD – Si tur cos cana manera mester, aki dos luna WEB ta cuminsa cumpra 10% di gas di EcoGas, su ‘partner’ nobo cu tin cu yud'e reduci uso di fuel oil. Segun cu director interno di WEB Luis Oduber a splica NoticiaCla.com, e intencion final ta pa cumpra henter e produccion di gas cu EcoGas tin planea di produci (total 30% di sushi procesa na Aruba), unabes cu nan produccion ta completo, cu ta ekivalente na 100 bari di fuel oil. Pa awor, EcoGas lo cuminsa produci ‘apenas’ 10% di gas, cu ta ekivalente na 30 pa 35 bari di fuel oil.

SUSHI RESIDENCIAL

E gas cu WEB lo cumpra, ta bin di sushi residencial, cu EcoGas lo transforma den gas. Estudio cu WEB a haci segun Oduber, a mustra cu e ta pas den e filosofia di ‘cleaner, greener and fuel oil free’ pa 2020. Y como tal, nan a opta pa bira un tipo di ‘socio’, y asisti e compania cu algun ‘tools’ pa por opera miho. Mientras cu Oduber sinembargo ta sigura cu WEB no tin ni arte ni parti den produccion di gas y no ta ‘co-doño’ di e compania (manera ta wordo specula), nan a percura pa traha e pipa cu ta core di WEB pa EcoGas, y mes momento ta provee e coriente pa EcoGas (contra pago) pa sigura continuidad di produccion di e gas necesario.

CUMINSA OPERACION NA OCTOBER

Berdad, segun Oduber, EcoGas tabatin algun contratiempo, pero a logra supera nan problemanan y awor ta parse di ta ‘up and running’, y ta actuando di un forma cu pa october proximo, WEB por spera e prome fase di transporte di gas (via tubo), directamente pa WEB. Inicialmente lo cuminsa cu un produccion di 10% di capacidad, y mira con ta bay. Segun Oduber, e intencion ta pa mira rapidamente con esaki ta desaroya y continua cu fase 2 y 3, cu por nifica cu pa mas tarda januari of februari di 2016, tur 3 planta di EcoGas lo por ta operacional. Esey lo nifica cu na tur, EcoGas por produci 30% di e sushi cu nan ta kima, y transforma esaki den gas. E otro 70% ta keda pa otro companianan por haci, of si EcoGas mes dicidi di haci tal den futuro.