Suspension a cay na METEO pa problema di aparato daña

ORANJESTAD – Un trahado den METEO a keda suspendi dialuna, a consecuencia di e investigacion cu ta tumando lugar rond di aparatonan daña. NoticiaCla.com a compronde for di e director mes, Marc Oduber cu no ta su persona a wordo suspendi si. “Mi ta na trabou”, Oduber a sigura e website aki awe merdia. Pero ora di puntra ken e persona ta, Oduber no kier a duna e nomber y a mustra cu e ‘no ta comodo’ pa los e nomber y cu e ta considera e situacion ‘algo delicado’. Loke por confirma tambe, ta cu e investigacion ta continua su rumbo y no ta descarta cu sea mas hende por haya suspension y of mas paso lo por wordo tuma.

CASO MES

"No ta momento pa busca fout, pero a admiti cu no tabatin un backup ‘in place’ pa evita e fayo di siman pasa cu a pone cu un cantidad di buelo (entre 5 cu 10) a keda cancela". Asina minister di transporte Otmar Oduber recientemente a contesta durante un conferencia di prensa, y desmenti cu ‘lo a prohibi entrada di personal di meteo den toren’ pa fungi como e di dos back up. A admiti cu no tabatin back up berdad, y awor ta trabou pa investiga kico exactamente a causa esaki. 'No ta momento pa busca ken ta responsabel'  segun e mandatario, aunke investigacion lo determina esaki despues.

GASTONAN INCURI

Gastonan cu a keda incuri, y cu – for di informacion cu NoticiaCla.com tin awe mainta, ainda ta drentando den forma di claims-, ta basta, no por wordo determina ainda exactamente cuanto esaki ta. Ni minister Oduber, ni ATA no tabata por a bisa awe mainta cuanto e gastonan aki tabata.

FAYO 

E fayo den e aparato di METEO di dos siman pasa, conoci como AWOS (Automated Weather Observation System) a costa pais Aruba basta placa. Diamars dos siman pasa ora cu e aparato a ‘bay down’ completamente, e la percura pa por lo menos 15 buelo cancela, di cual mayoria tabata mericano, uno local y uno di Colombia. Na tur, por lo menos 1064 pasahero a keda pega na Aruba, y cu mester a haya asistencia pa esaki. Y mirando cu no ta trata di un fayo mecanico, esun cu a causa e inconveniencia, tin cu cubri e gastonan aki. Y den e caso aki, esey ta pais Aruba.

ATA A CARGA GASTONAN PA FAYO

Aruba Tourism Authority a confirma e fin di siman pasa, cu nan a tuma e hospedaje, transporte, F&B pa nan encargo di esnan cu a keda pega na Aruba diamars y cu no por a sali sino te diaranson. Esey ta nifica cu ta riba mil turista mester a keda atendi, y cu riba su mes a costa basta placa. “Nos ta expresa nos gratitud na tur esunnan cu di un of otro manera a coopera y a yuda pa asina e pasaheronan cu mester a keda Aruba, a wordo atendi debidamente” e CEO di ATA, Ronella Tjin Asjoe a declara den un comunicado . E CEO a admiti cu e operacion tabata uno cu a rekeri un bon coordinacion di e ekipo di ATA, pa asina sigura ‘ cu nos cordialidad y hospitalidad por a prevalece y cu e inconveniencia pa e turistanan ta lo minimo posibel”.