Otro luna aeropuerto tin director nobo

ORANJESTAD - Entrante 1 di augustus aeropuerto ta haya un hefe nobo, aunke no kier divulga ainda ken e persona aki ta. Director di aeropuerto Peter Steinmetz su ultimo dia di trabou ta 1 di september di 2014. E contract cu Schiphol group, ta stipula cu nan tin cu presenta un persona nobo pa e funcion di CEO di aeropuerto. Como tal ta keda na nan pa haci tal. "Si e persona ey ta aceptabel pa e compania, e lo por wordo nombra" Steinmetz a bisa. Ni pa nada e kier a bisa si e persona ey ta un persona local of stranhero. Noticiacla tin informacion cu ta trata di un persona mericano pero cu ta den servicio di Schiphol Group na Merca, y cu e posiblemente lo yena e vacatura aki. Loke cu NC a compronde tambe, ta cu e persona lo no ta niun di e dos personanan actual cu ta den 'bullpen' pa e funcion aki. Tanto Giovanny van Wijk como Jurgen Benschop ta 'in the running' pa eventualmente haya e funcion aki. E intencion di gobierno di Aruba, como accionista unico di AAA NV, tabata semper pa laga un persona local na cabes. Si esey ta e caso 1 di augustus, no ta mucho cla, pero tur indicacion ta mustra cu esaki pues lo no ta un hecho dia 1 di augustus proximo. "Ni maske mi tabata sa, mi lo no divulga esaki pasobra no ta na ami pa haci esaki", e director a finalisa bisando. Steinmetz a fungi pa mas di 10 anja como director di aeropuerto, contrario na e contracto inicial di 3 anja. Cada bes tabata prolonga e contract a base di prestacion positivo di e director.