Oduber: WEB lo por cera aña 2015 cu balansa positivo atrobe

ORANJESTAD – Si tur cos bay bon, pa fin di aña WEB Aruba NV, lo por sali for di ‘rood’ atrobe. Asina director general interino Luis Oduber a confirma na NoticiaCla.com. Pasonan cu nan a tuma na comienso di aña, a pone cu poco poco nan ta sacando cabez for di awa, y riba papel, nan ta practicamente ‘for di rood’, esta no den debe mas.

FINANZAS MEHORANDO

WEB ta asina leu aworaki cu nan a ‘finanzas a drecha hopi’. “Nos forecast ta mustra cu nos ta bay end up positivo e aña aki “Oduber ta sigui bisa, aunke den mesun rosea ta bisa cu esey ta ‘riba papel’. Den nan statement di ‘profit & loss’ WEB ta mustra cu nan ta bay saca ganashi. Pero e parti di cash flow ta mustra ainda cu nan ta den rood. Algo cu nan tabata aden pa prome 6 pa 7 luna di e aña aki. “Awor nos ta saliendo poco poco afo” Oduber a bisa. Sinembargo bo no por celebra ainda cu nan a logra esaki, pasobra cualkier ‘upset’, esta problema cu nan haya, nan lo mester saca placa atrobe.

A RANCA E BEL

Tabata final di aña pasa, WEB a ranca e bel financiero, ora cu a nota cu nan no por a haya financiamento di banco pa por cumpli cu cierto obligacionnan. Nan ‘rationan’ no tabata faborabel. Esaki ta nan situacion cu nan mester mantene pa garantisa cu nan por paga bek. “A hala handrem. Mayoria di proyecto, si no ta tur, a wordo posponi. Nos a uza e fondonan pa sigui haci mantencion cu nos no a para” Oduber a bisa. A reahusta e plan di mantencion, teniendo cuenta si cu e risiconan posibel.