Prohibicion buelo directo di Eindhoven pa Aruba y Corsou

DEN HAAG – Gobierno hulandes a prohibi buelo directo for di Eindhoven pa Aruba y Corsou. Asina minister di husticia hulandes Van der Steur a informa Tweede Kamer na Tweede Kamer pa medio di un carta (lesa e carta aki) y pa medio di un comunicado. Gabinete Rutte kier pa buelonan considera como ‘risico’ pa e.o. traficacion di droga, por aterisa solamente riba un aeropuerto cu tin suficiente facilidad pa controla esaki. Actualmente ta Schiphol so tin suficiente facilidad pa atende cu e ‘asina yama’ buelonan risico. Ta considera buelonan di Curaçao, Aruba, Bonaire, Sint Maarten, Surnam y Venezuela como buelo risico.

ADAPTACION DI LEY

Ta trahando riba un adaptacion di e ley di aviacion, unda cu buelonan risico por baha solamente riba aeropuertonan cu tin facilidad suficiente pa controla. Awor e ta un medida cu gobierno a anuncia. Y si tur cos bay segun plan, e proposicion lo bay den consulta.

ARKE FLY

E asunto aki ta crea problema pa e aerolinea Arke Fly cu na november di e aña aki ainda kier a inicia cu buelo directo pa Aruba y Corsou for di Einhoven. Esey awor no ta posibel. Como tal cu consulta cu gobierno, a dicidi di traslada e buelonan ‘extra’ aki, pa Schiphol cu ya caba ta efectuando mas buelo pa e destinacionnan aki.

CONTROL 100%

E controlnan 100% na Schiphol a inicia na 2003 caba, pa bringa e concepto di gulido di bolita (di droga). Bula intercontinental mente for di aeropuertonan regional no tabata na ordo ainda. E maneho di e gabinete mientrastanto ta pa laga mas tanto buelo vacacional tuma lugar di aeropuertonan regional, pa por libra e peso di Schiphol mas grandi ainda.