Politico di MEP y AVP lo entrega keho na ministerio publico

ORANJESTAD – Siman ta habri cu dos politico entregando keho na ministerio publico. Tanto Marisol Lopez Tromp como Evelyn Wever Croes lo entrega nan respectivo kehonan, pa cosnan cu segun nan, tabata un menasa contra nan bida. Evelyn Wever Croes a confirma na NoticiaCla.com su keho, ta contra e propio Marisol Lopez Tromp cu, -segun Wever-, deliberadamente a pone bida di Wever na peliger diahuebs durante reunion parlamentario. Lopez, -segun fuentenan serca di dje-, lo entrega keho contra e persona cu lo a agredi’e verbal y fisicamente diasabra den un supermercado local. No ta conoci pa NoticiaCla.com ki ora e damanan lo entrega nan respectivo keho. 

LOPEZ

Lopez su denuncia ta basa riba un actuacion di un señora cu a aserc'e den supermercado diasabra y lo a cuminsa insult’e cu palabra y despues lo a bay asina leu di agredi’e e.o. den su cara. E la sinti su mes menasa di tal forma, cu a opta pa entrega keho contra e señora aki dialuna awor na ministerio publico.

WEVER

Pa loke ta Wever, a hala atencion di Lopez varios biaha pa tin seguridad pa nan, basa riba su observacion di cosnan sosodiendo, y cu e la sinti su mes y su fraccion menasa. Pero nada no a wordo haci segun Lopez pa garantisa seguridad di Wever y su fraccion. Como tal e lo entrega keho dialuna na ministerio publico y uza canalnan internacional tambe.