Atech conference tabata un plataforma pa inovacion y oportunidad

ORANJESTAD - Weekend cu a pasa ATECH* Conference a bira un hecho. Den un ballroom yena cu profesionalnan di tur industria a bini hunto, tur cu e mesun objetivo: pa haya sa mas encuanto di e importancia di tecnologia pa startups. Durante e Conferencia aki diferente compania nan local renombra manera PWC, CMB y Biz Link Aruba a sorprende e publico door di exclusivamente lansa diferente plataforma tecnologico cu lo brinda mas oportunidad na nan clientenan, negoshinan y entrepreneurs den un manera mas inovativo.

PWC START

PWC ta lansa nan PWC Start. Esaki ta un app cu ta haci tur informacion cu bo mester tene cuenta cune ora di lanta un startup accesibel na palma di bo man. Banda di esaki CMB bo Banco Amigo ta lansa nan plataforma Friend Funding. Aruba su prome plataforma di “crowd funding”! Y por ultimo Biz Link Caribbean ta lansa un plataforma yama ArubaBiz Plaza unda ta conecta negoshinan local cu negoshinan internacional den un manera mas facil y rapido. Entre e oradonan tabatin esun local pero biba den exterior Micheal Tchong como tambe di e hoben for di New York John Henry cu a bin cu e tremendo lema di “Believing is Seeing”.

DEMODAY

Durante e Demo day 5 Startup a presenta nan producto na un panel di hurado. Aki por wordo bisa cu cada un di e presentacion nan tabata di nivel hopi halto. Na final di esaki e team di Jamaica a bai cu e premio di $20.000 door di nan tremendo presentacion di con por facilita e comunicacion y distribucion entre “Farmers” cu nan servicio di ‘E-AgriCulture’ yama AgroCentral.

MENSAHE PRINCIPAL

Interumpi, inova y ta creativo den e mercado actual tabata e mensahe principal di tur e oradonan presente. Tin e confiansa y durf di cuminsa algo pa bo mes ta e cos mas great cu tin. Bin cu un idea nobo, inovativo, creativo y interumpi e forma usual di haci comercio ta cosnan cu por pasa awendia den un frega di wowo cu tur e tecnologia.

FUTURO ATECH

Keda pendiente pa mas informacion cu lo sali e dianan nos dilanti, sigur di kico ta ATECH* XL 2016! Segun organisadonan di e evento, un conclusion si por wordo tuma ta cu ATECH* a pone Aruba su nomber resona den mundo di Tech rond di mundo. Pa por sigui tur desaroyo di ATECH* den e temponan nos dilanti por download e app como tambe bishita www.atechconference.com of www.facebook.com/atechconference.