Gregory Elias: Curacao North Sea Jazz 2015 lo no defrauda

PARTI 1

WILLEMSTAD – Tur preparacion ta cla, y manera cu e organisacion ta asina eficiente despues di 5 aña, ora cu e siman aki habri, ta warda tin cu warda e di 6 edicion di Curacao North Sea Jazz cuminsa diahuebs awor. Den un entrevista exclusivo pa NoticiaCla.com, organisado, promotor y doño di e evento, Gregory Elias tin tur confiansa cu atrobe esnan cu bishita e evento, lo no sali defrauda. Y manera cu e ta bisa, pa tur edad y gusto, tin algo na smaak.

CAMBIO DI FECHA

E fecha e aña aki ta enberdad mas laat cu normal, pero ta simplemente pasobra e ta mara na e dia nacional mericano Labor day, cu e aña aki ta cay riba 7 di september. “P'esey nos a hacie un tiki mas laat” Elias a sigura NoticiaCla.com. Pues ningun momento tabata pa stroba ningun otro festival, manera cu ta wordo bisa. Pa basta dia tin rumor cu ‘lo a cambia e fecha intencionalmente pa stroba e Electric Festival na Aruba cu ta cay riba e mesun fechanan’. Pero nada di esey ta berdad. “A bira un tradicion cu nos ta busca un ‘aansluiting cu e dia liber ey di Merca” Elias ta sigura un biaha mas, refiriendo na Labor Day.

DIFICIL CUA ARTISTA TA MAS GUSTA

Artistanan cu mas a hala atencion, ta dificil pa bisa. Benta di carchi ta bayendo hopi bon. Tur dos anochi ta coriendo ‘mano a mano’ segun Elias. Como tal ainda tabata dificil pa bisa cua di e dos anochinan ta cay miho cu otro. “Sigur si bo papia di e closer nan’. E siman aki bo lo ripara sinembargo cua ta esnan cu ta mas gusta of escohi. Y den e seno mes di Elias, no tin un grupo cu a sobresali riba otro. “Hende jongnan, tin e aña aki tanto pa diabierna y diasabra artistanan famoso y hopi grandi internacional “Elias a sigui bisa. “E balansa ta asina bon, -gamble mi ta gamble pa acomoda tur hende,- pero mi ta tende cu hopi ta cay pa e cariño di Enrique Iglesias, pero tambe John Legend y Usher. Nan ta bay pa e tresnan ey”.

DOLOR DI CABEZ MAS GRANDI PA ELIAS

Un siman prome cu e evento tuma lugar, pa un promotor di evento, Elias semper ta keda masha critico pa weita e benta di carchi cana bon. “Pami esey ta algo importante. Nos tin dos dia cu hopi hende, pero no exageradamente hopi hende. Pero no tin precupacion as such, pasobra by now mi a siña mira tur e fout chikitonan ey cu otro hendenan no ta wak. Mi a siña biba cu nan” Elias ta sigui conta. “Aworaki mi no tin echt precupacion. Mi precupacion ta solamente cu mi ta haal e targetnan cu mi ta buscando, pa wak cu e aña e escoho di e artista cu nos a buta, a cay na agrado di hende”. Si compara expectativa di e aña aki compara cu e ultimo 5 añanan, Elias ta kere cu lo iguala sigur e festival di aña pasa cu tabata uno di espectaculo, tanto pa e bishitante como e artistanan. “Nos ta bay iguala e sfeer, efecto y e grandesa di aña pasa” Elias a bisa.