Orden di abogado preocupa cu rapport CPT riba Aruba

ORANJESTAD – “Aunke detenido y prizoneronan na Aruba den 2015 ta wordo sin mas, miho trata cu na Inglatera den periodo di e asina yama ‘Magna Carta’, e trato ta leu di ideal”. Vice deken di orden di abogado na Aruba, Johan Sjiem Fat a referi diabierna ultimo na e rapport ultimo di CPT (European Committee for the Prevention of Torture and Inhuman or Degrading Treatment or Punishment) durante su discurso den Corte na occasion di instalacion di huesnan nobo. E rapport ultimo di CPT a keda publica dia 25 di augustus ultimo, y ta relata nan bishita na 2014. (lesa e rapport aki)

RESULTADO DI E RAPPORT

Segun e rapport, tin por lo menos 4 punto cu ta wordo subraya pa CPT cu no ta cuadra y cu mester wordo drecha. Entre nan, uso desproporcional di violencia door di polis contra detenidonan geboeid, cu ta wordo bati y geskop. Tambe e hecho cu tin celnan a higienico y complehonan di cel unda cu e WC y riolering no ta funcionando pa un tempo basta largo. Ademas ta papia di falta di cuido medico adecuado y psikiatrico di detenido. Tin te hasta (como punto # 4) un caso di un detencion di duracion largo di un preso, completamente sunu, debi na peliger di suicidio. Segun e vice deken, algun di e situacionnan aki ta wordo confirma pa miembronan di e orden di abogado, cu ta atende cu hopi caso penal.

REACCION DI MINISTER

Reaccion di minister di husticia (Arthur Dowers) riba e publicacion di e rapport, ta bisa ,-segun Sjiem Fat ta sigui relata-, cu ‘e detencion ‘sunu’ di un prizonero suicidal no ta un maneho fiho di autoridad’. Segun Sjiem Fat, ta bon pa tende esey, aunke e no ta kita for cu ta tristo cu den un caso incidental, un detencion asina a tuma lugar. Na di dos lugar, minister Dowers ta bisa cu e criteria cu CPT ta usa, ta hopi rigoroso, y cu ‘no ta e intencion cu Aruba mester ubica su prizoneronan den complehonan luhoso’.

REACCION ORDEN DI ABOGADO

Orden di abogado, -Sjiem Fat ta sigui bisa-, no ta propaga tampoco cu detenidonan mester wordo trata cu luho. “Pero cuido medico adecuado y celnan higienico cu funcionamento bon di WC y riolering, no ta un luho sino un ‘beneficio’ basico cu cualkier detenido tin derecho ariba, y cu tambe ta wordo sigui pa obligacionnan di tratado pa Aruba.

USO EXCESIVO DI VIOLENCIA

Pa loke ta e uso excesivo di violencia di polis contra detenido, ta algo ‘odioso’ segun Sjiem Fat. ‘E caso di Mitch Henriquez na Den Haag a siña nos cua tragedia cierto exceso por conduci na dje. “Orden (di abogado) ta spera cu pronto lo por tin solucion pa e casonan specifico menciona” Sjiem Fat a sigui bisa.