Eman: Dialuna voluntarionan lo yuda drecha edificio di parlamento

ORANJESTAD - Despues di un reunion entre prome minister Mike Eman y presidente di parlamento Marisol Lopez Tromp diasabra, a dicidi cu ta bay laga e comunidad forma parti di e 'team' cu tin cu bay 'drecha' e daño causa di e disturbio di diahuebs ultimo. Hopi ta e daño causa, y a dicidi cu dialuna awor 'hunto cu e comunidad voluntario' ta bay cuminsa drecha loke tin cu drecha. " Nos a dicidi di tuma iniciativa pa hunto cu comunidad bai haci reparacionnan na e dañonan haci na nos Parlamento" Eman a bisa riba su pagina di Facebook diasabra anochi." Dialuna mainta trempan nos ta cuminsa hunto cu Pueblo e trabaonan aki. Mi ta desea di invita voluntarionan pa hunto nos duna un man" e mensahe ta sigui bisa. No ta bisa si den ki forma, y con exacto esaki lo tuma lugar. Mas sigur den curso di diadomingo, lo tin mas informacion pa e comunidad, di e trabounan cu lo tin cu cuminsa dialuna proximo. E ta mustra manera dia cu Eman a tuma gobierno over na 2009, y den forma voluntario a pidi pa comunidad yuda drecha bestuurskantoor, cu pa un periodo di 8 aña no tabata den uso mas.

DAÑO NA PARLAMENTO

Apenas un dia prome, Lopez mes a purba describi e daño di e edificio durante un conferencia di prensa “Parlamento a keda practicamente destrosa” Lopez Tromp a describi e situacion di e edificio un dia despues di e disturbionan violento di diahuebs anochi. Un total di 25 bentana (y porta) kibra, daño di candela, menasa personal contra su persona y famia, y mas. Tur esaki ta cosnan cu e presidente a resumi durante un conferencia di prensa diabierna, unda cu e la duna detayes di tur loke a sosode un dia prome.

DESTRUCCION GRANDI

Mientras cu henter dia tabatin movecion, tension, y cierto destruccion, Lopez a mustra cu e destruccion mas grandi a bin despues di votamento di e ley di colegio di supervision. Ta ora cu e reunion a caba, ta cu e daño mas grandi a tuma lugar. Lopez a mustra tambe cu tin indicacion serio cu e ‘meta tabata pa drenta parlamento y ocupa e sala di parlamento’. Algo cu e grupo di manifestante no a logra.

DAÑO FINANCIERO

E daño financiero no ta conoci ainda, y ta awe den dia a cuminsa acesora e situacion y calcula cuanto e daño ta. Loke Lopez a recorda esnan cu a haci e daño tambe, ta cu e daño ta sali for di e mesun saco di e pueblo pagado di belasting, pues ta nan mes nan a haci daño door di causa destruccion, y consecuentemente causa mas gasto pa parlamento. “Awor nan ta bezig cu esey” Lopez a bisa NoticiaCla.com, refiriendo na e calculacion di daño material.