Seis persona (di 12) ta keda deteni pa disturbio di diahuebs

ORANJESTAD -Polis diahuebs anochi a detene 12 persona pero fiscal a laga 6 den libertad despues. Inicialmente e cifra a wordo poni na 20, pero finalmente e cantidad ‘oficial’ a wordo suministra diabierna atardi. Asina e comunicado di polis a confirma. Segun e comunicado, e hecho cu algun polis a resulta herida durante e manifestacion dilanti edificio di parlamento diahuebs ultimo ta pone cu mester bolbe analisa e reglanan ora di atende cu tipo di actividadnan asina. “Bou ningun circunstancia polis lo permiti uzo di violencia, destruccion y vandalismo contra propiedad di gobierno y contra hende inocente” e comunicado ta sigui bisa.

TOLERANCIA

Apesar cu na un principio a demostra un grado masha halto di tolerancia pa cu e manifestantenan, toch na final a nota un grupo chikito cu tabatin otro metanan. Na tur pues, polis a detene 12 persona na e sitio. Despues di evaluacion, Fiscal Auxiliar a laga 6 di e sospechosonan bay cas y a mantene 6 sospechoso encarcela pa mas investigacion.

DELITONAN COMETI

E delitonan cometi durante e manifestacion tabata violencia publico, maltrato cu un arma, nenga di sigui instruccion di Polis y pa bringa cu Polisnan trahando. Pa loke ta e sospechoso cu a tira "pepper spray" den cara di un grupo di hende, tambe a tuma keho di e victimanan y a sali un ordo di detencion mesora contra e persona envolvi.

MANTENE ORDO

Cuerpo Policial tabata cu mas o menos 50 Polis na e sitio pa mantene ordo publico, pero na dado momento a manda yama tur Polis trahando pa presenta na e sitio. Tambe a manda yama Polisnan for di cas pa por a subi warda pa reforsa coleganan trahando y di cual algun a resulta herida ora a tira boter y piedra riba nan.

MANTENCION DI ORDEN

Segun e comunicado, mester ta cla pa tur hende cu Polis tey pa mantencion di orden publico y ta purba mas cu ta posibel pa tene situacion calmo y duna tur ciudadano su espacio pa expresa su malcontento den forma di manifestacion, contal cu ta keda pasivo. Asina cu crusa e limite di locual ta aceptabel y tolerabel pa ley, lo actua contra e sospechosonan.