Pa mal entendimento trahadonan di Serlimar a welga awe mainta

ORANJESTAD – Trahadonan di Serlimar diabierna mainta tempran a bay den accion, sostene pa nan sindicato STA. Vocero di e compania Natalie Wolff a confirma cu e accion aki a cuminsa hopi trempan (prome cu 6’or ) y a sigui te 11’or di mainta, indicando mesora cu e la causa tambe pa disruption di e operacion for di mainta tempran te cu 11’or di mainta. Mientrastanto e ‘mal entendimento nan’ a keda soluciona y ya pa 11’or tur cos tabata bek na normalidad.

ACCION NO PLANEA

Segun Wolff, e accion no tabata uno planea. “Nos a logra sinta cu nan y yega na acuerdo cu nan”. Entre e mal entendimento, e trahadonan lo a kere cu parti di un departamento di Serlimar cu ta contratista, lo a ricibi pago na momento cu tabatin manifestacion. Esey no tabata corecto segun Wolff. “Serlimar a mantene estrictamente pa tur trahado, como contratista, di no work no pay. Y aparentemente algun trahado a bay protesta. Esey tabata un informacion no corecto cu e trahadonan tabatin, pa cual nan a strike” Wolff a bisa.

CONFLICTO DI INTERES

E otro mal entendimento tabata pa un conflicto di interes unda cu un chef di departamento primordial di Serlimar, lo tabatin interes pa ta un shop steward di sindicato STA. “Pa esaki si nos a logra yega na un entendimento unda cu nada no ta bay cambia” Wolff a bisa. E persona lo keda den su funcion. No mas como un shop steward. E lo por keda como miembro, ya cu nunca Serlimar no a opone na ningun miembro di un of otro sindicato. “Nos a logra un consensus riba e parti y ya parti e rutanan a continua cu nan ruta bek. Tur ruta comercial y residencial a sigui. NOTA: E foto ta di archivo di e accion na comienso di aña na dump.