Nuboer: InselAir Aruba pronto por cuminsa codesharing cu KLM

ORANJESTAD – InselAir Aruba ta kedando cla pa su certificacion cu ta dune e derecho pa cuminsa cu e proceso di code-sharing cu otro aerolinea. E compania cu ta bay codes hare cu InselAir Aruba segun e CEO di e compania, Frederick Nuboer, ta KLM. Segun Nuboer a splica NoticiaCla.com, nan tin lunanan caba preparando e certificacion di e IATA operators certificate pa seguridad. Den preparacion ey, henter e operacion mester a cambia. Ta papia di entre otro cambio di manual y proceduranan cu mester wordo cambia.

AUDIT

Parti di e proceso, tabata bishita di 5 auditor for di Merca y Europa. Tres ta di Merca (ex pilotonan di Delta, y 2 di Air France) a bin check si InselAir Aruba tabata cla pa por wordo tuma den e registro di e loke ta wordo yama IOSA. E ta e registro cu ta wordo traha door di IATA. Ora cu bo drenta den e registro ey, bo ta haya e derecho di por haci codesharing cu otro compania cu ta den e mesun registro ey. Un di e companianan ey, esta KLM, ta un di e companianan cu InselAir Aruba ta papiando cune pa varios tempo caba. InselAir na Corsou ta haci esaki caba, pero awor InselAir Aruba mes por haci esaki.

BENEFICIO DI CODESHARING

Como aerolinea, esaki ta nifica cu e fluho di pasahero ta bay aumenta grandemente. Cu e certificacion aki, bo ta drenta den un network hopi mas grandi cu solamente esun di bo so. Eynan bo ta bay haya cu hendenan cu ta bula di lew cu KLM, ta sigui bula cubo. “Pa nos e ta algo sumamente importante, y e ta bay duna posibilidad pa crece hopi mas cu nos ta bezig” Nuboer a bisa. Den termino di 60 dia ta premira cu por keda cla cu e proceso. Un punto di remarca segun Nuboer, ta cu for di e 1000 punto riba cual nan mester a wordo geaudit, ta apenas 22 punto mester pone atencion, mas bien administrativo. Pero na tur, sigur un bon logro segun Nuboer. NOTA: e foto ta uno di archivo durante un bishita di InselAir Aruba na Republica Dominicana.