Lopez-Tromp: Parlamento a keda practicamente destrosa

ORANJESTAD – “Parlamento a keda practicamente destrosa”. Asina presidente di parlamento Marisol Lopez Tromp a describi e situacion di e edificio un dia despues di e disturbionan violento di diahuebs anochi. Un total di 25 bentana (y porta) kibra, daño di candela, menasa personal contra su persona y famia, y mas. Tur esaki ta cosnan cu e presidente a resumi durante un conferencia di prensa diabierna, unda cu e la duna detayes di tur loke a sosode un dia prome.

DESTRUCCION GRANDI

Mientras cu henter dia tabatin movecion, tension, y cierto destruccion, Lopez a mustra cu e destruccion mas grandi a bin despues di votamento di e ley di colegio di supervision. Ta ora cu e reunion a caba, ta cu e daño mas grandi a tuma lugar. Lopez a mustra tambe cu tin indicacion serio cu e ‘meta tabata pa drenta parlamento y ocupa e sala di parlamento’. Algo cu e grupo di manifestante no a logra.

DAÑO FINANCIERO

E daño financiero no ta conoci ainda, y ta awe den dia a cuminsa acesora e situacion y calcula cuanto e daño ta. Loke Lopez a recorda esnan cu a haci e daño tambe, ta cu e daño ta sali for di e mesun saco di e pueblo pagado di belasting, pues ta nan mes nan a haci daño door di causa destruccion, y consecuentemente causa mas gasto pa parlamento. “Awor nan ta bezig cu esey” Lopez a bisa NoticiaCla.com, refiriendo na e calculacion di daño material.

CAMBIA STRATEGIA PA SEGURIDAD

E situacion di ayera, a pone nan evalua cu pa proximo reunionnan cu por indica cu tin tipo di tension y atencion asina, cu nan mester re-evalua e asunto di seguridad pa evita cu algo asina por ripiti.

MENASANAN RICIBI

Pa loke ta e menasanan, e la confirma cu e la tende via cierto radio emisoranan y tambe hendenan pafo, cu lo a duna nomber di adres di su cas y di su mayornan y a menasa su famia. “Hasta e personal di Staten a wordo zundra y menasa ora cu nan a sali fo'i Staten” Lopez a sigui bisa NoticiaCla.com diabierna atardi.