ATECH a reuni profesionalnan di tur industria hunto

ORANJESTAD, E prome dia di ATECH* Conference ta un hecho y organisadonan ta considera cu esaki tawata un exito rotundo. Den un ballroom yena cu profesionalnan di tur industria a bini hunto tur cu e mesun objetivo: pa haya sa mas encuanto di e importancia di tecnologia pa startups.

MENSAHE PRINCIPAL

Interumpi, inova y ta creativo den e mercado actual ta e mensahe principal. Tin e confiansa y durf di cuminsa algo pa bo mes. Bin cu un idea nobo, inovativo y creativo y interumpi e forma usual di haci comercio. Tawata tin presentacion di diferente orador local como tambe internacional compartiendo nan experencia y dunando informacion clave y interesante pa startups.

SHARK TANK

Banda di presentacionnan den e sala principal, a tuma lugar den un otro presentacion encuanto mercadeo y e importancia di esaki den e mundo digital. Ademas a tuma lugar un session al estilo di Shark Tank organisa pa PwC Aruba.

DIA DOS

Awe ta sigui e di dos dia di ATECH* Conference cu lo ta den forma di un Demo Day. 5 startups lo tin e oportunidad di presenta nan prototipo. Lo tin un grupo di hurado profesional kende lo tin e tarea pa saca un ganador cu lo gana $20,000.

APP DOWNLOAD

Pa por sigui tur desaroyo di ATECH* por download e app, bishita www.atechconference.com of www.facebook.com/atechconference. Y lesa corant den e dianan venidero.