Trump ta felicita presidente electo di Colombia

BOGOTÁ – Presidente di Merca, Donald Trump, a felicita Abelardo de la Espriella despues cu resultado preliminar di eleccionnan presidencial na Colombia a indica cu el a gana e carrera pa presidencia. Varios lider di derecha den Latinoamerica tambe a felicite'é.

De la Espriella, un abogado y empresario di 47 aña conoci como “El Tigre”, a gana cu un diferencia minimo y a basa su campaña riba un enfoke duro contra violencia, narcotrafico y grupo arma cu ta opera den Colombia.

Entre su principal propuesta nan tin construccion di diez mega-prizon, sentencianan mas severo pa criminalnan, accionnan militar contra narcotraficante y reduccion di tamaño di gobierno.

E presidente electo tambe kier fortalece cooperacion cu Merca, specialmente den combate contra narcotrafico. Analistanan ta considera cu su posible victoria lo duna Trump un aliado conservador importante mas den Latinoamerica.

Mientrastanto, candidato di izquierdista Iván Cepeda a anuncia cu e lo cuestiona resultado di varios centro di votacion. Autoridad electoralnan ta spera confirma e resultado oficial den e dianan benidero, mientras cu inauguracion di e nobo presidente ta programa pa 7 di augustus.