Marisol Lopez riba su experencia cu Frente Uni y e consecuencia

ORANJESTAD – Loke por a conduci na e destruccion di entrada di porta di parlamento diahuebs merdia, tabata e hecho cu presidente di parlamento Marisol Lopez Tromp no a reuni cu nan. Esaki por conclui for di e conferencia di prensa di e presidente di parlamento diabierna merdia. Segun Lopez, ora cu e ‘ultimatum’ di 30 minuut pa reuni cun'e a vence, e grupo yama “Frente Uni” a laga sa cu ‘no ta interesa mas y lo tuma nan paso’. Ta despues di esey, e destruccion a cuminsa.

PROME CARTA

Segun Lopez, e prome carta a bin mainta di e grupo consistiendo di 5 sindicato, esta STA, TOPA, SPA, SCCA y ABV y tambe partido politico MEP. Nan lo a pidi un reunion cu e presidente riba e topico di e colegio di supervision financiero. Pero pa ora cu Lopez a ricibi e carta, e reunion a cuminsa caba. Lopez a bisa awe merdia, cu e la informa e grupo ,-cu ta yama nan mes Frente Uni-, cu e reunion ta bezig caba y cu e lo sigur sinta cu e grupo durante curso di dia.

DEADLINE A VENCE

Pero pa 1’por di merdia, e presidente a ricibi un otro carta, indicando cu ta duna e presidente 30 minuut mas pa reuni. Ora cu Lopez ,-segun e la splica awe merdia-, a pidi e vocero pa clarificacion si e 30 minuut ta e tempo cu e ta haya pa reuni, of cu ta 30 minuut falta pa e reuni cu nan, nan a informe e ultimo. E la notifica nan e momento ey cu esey no ta posibel pero cu sigur e lo reuni cu e grupo. Ta for di e momento ey despues, cos a cuminsa bira mas intenso, y cu a cuminsa sinti cu destruccion a cuminsa wordo haci.

DESTRUCCION

Entre nan, e kibramento di porta di entrada di parlamento, cu bentana. Ta danki na e cantidad di seguridad cu a busca di tanto polis como otro instancia, cu a evita lo peor. Esey no ta kita afo cu e loke a sosode segun Lopez, sigur no ta corecto. E la compronde cu e partido politiconan cu a haci e yamada pa varios dia caba, tabata pa ‘bin parlamento pa stroba e reunion’. Como tal a percura pa tabatin suficiente seguridad paden y pafo, pa tur hende por a sigui nan trabou sin problema. Algo cu awor tin cu bay re-evalua, pa e loke a sosode diahuebs, no ripiti mas. NOTA: e foto ta di e momento cu Frente Uni tabata dirigi su mes na e publico dilanto entrada di parlamento.