Gobierno a prohibi ex docter di Michael Jackson pa traha na Aruba

ORANJESTAD – Gobierno di Aruba a rechasa e peticion pa e ex docter di defunto artista Michael Jackson bin traha na Aruba. NoticiaCla.com a pone man riba copia di e conseho di parti di management team di directie volksgezondheid, cu ta conseha contra e peticion. Como tal NoticiaCla.com tin confirmacion cu gobierno a ricibi e conseho aki y basa riba esey, a rechasa e peticion.

DEPT DI SALUD

Segun e conseho, e miembro di management team di e departamento di salud, Wilmer Salazar ta contesta riba e peticion haci na comienso di mei ultimo (5 di mei). Segun e carta di Salazar, investigacion haci a determina cu Murray no por eherce su funcion di medico den tur forma na Merca. Un di e puntonan ta cu e universidad di cual Murray tin su diploma, Loma Linda University, ta situa den estado di California unda cu Murray tin prohibicion pa traha. Esaki pasobra e tin un sentencia penal den su contra. Y como tal e permiso pa e traha eynan como medico, a keda revoca.

MOTIVACION

Y basa riba articulo 2 di e landsverordening Uitoefening geneeskunst, Conrad Murray, no por traha como medico na California, y como tal no por haci esaki tampoco na Aruba. “Como tal e peticion menciona no por wordo honra y ta wordo rechasa”, e conseho ta bisa finalmente. Pues Conrad Murray no ta bin traha na Aruba como medico.

E PETICION INICIAL

Manera cu NoticiaCla.com a raporta na juli caba, e docter di e artista mundial Michael Jackson, Conrad Murray a solicita pa bin traha na Aruba como medico na mei di e aña aki. Informacion confirma cu NoticiaCla.com tin, ta cu e la haci intento pa traha na Aruba, via un medico local. E intencion tabata pa e bin yuda e medico local aki. Fuentenan serca di e proceso, a confirma cu e peticion a drenta, pero cu no ta conoci si lo aproba esaki. “Ta pendiente pa wak si e tin ‘strafkaart’ y si esaki ta actualisa ‘ainda’.

CASO MICHAEL JACKSON

Manera ta conoci, Murray a haya su mes envolvi den un caso penal na september di 2011, ora cu e mester a presenta den corte, acusa di homicidio involuntario, pa a causa morto di Jackson dia 25 di juni 2009. Murray a wordo haya culpabel na 2011 mes, y sentencia pa 4 aña di prison. Pero apenas 2 aña despues na 2013 a lague den libertad pa motibo cu prison tabata yen, y e la ‘comporta su mes bon’. For di Associated Press, tin informacion cu e licencia di docter di Murray ta ‘suspendi’ den tres estado unda cu e la yega di traha como docter. Sinembargo, esey no ta nifica cu e suspension aki ta conta pa exterior tambe. Esey ta loke cu oficialnan di gobierno (cu tin cu aproba su peticion) tabata averiguando aworaki, prome cu e decision final cay. Y e desicion final a cay awor.