Disturbio dilanti parlamento a bay fo'i man

ORANJESTAD - Manifestantenan cu no a gusta e resultado di e votamento awe nochi di e ley di supervision, no a sconde nan rabia awe nochi. Apenas algun minuut despues cu e resultado tabata conoci di e votamento, algun persona a cuminsa causa destruccion na e edificio, y despues sigui pa autonan di e.o. DOW. Ora cu nan no a logra (esnan di e auto a core drenta den e autonan y core bay hopi duro mes), nan a pasa man pa e luznan grandi di DOW, cu ta sende cu delco. Nan a bira e luznan y tiranan mei mei di caminda, dilanti parlamento, y despues cende esaki a candela. Esey no tabata suficiente. Despues a sigui pa kibra bentananan di parlamento. Cu botter, piedra y mas, a pasa practicamente na tur e bentananan abou y kibra esaki. Dado momento nan a yega na e porta principal di parlamento (cu ya merdia a wordo kibra caba), y a bolbe kibra esaki mas, purba drenta paden y cende algo na candela eynan tambe. Asina nan a sigui rond, pa purba kibra tur cos den nan caminda. Mientras cu tur esaki tabata tuma lugar, no por a mira polis ningun caminda. 

REFUERSO POLICIAL

Algun rato pasa, polisnan a aparece di tur caminda. Riot commando, polisnan cu cacho, y polisnan den uniform regular, a subi caminda na cantidad, y bay pa tur esnan cu nan a haya den nan caminda. A cuminsa un coremento di tur hende, cu a ripara cu polis tabata serio den nan intencion. Usando parti di e mall (Seaport Market Place) como nan 'base', polis a pasa pa detene varios persona, (a conta como 20), y cierto momento hasta tiro di advertencia a cay. Tin informacion cu un polis a keda herida, pero esey no por a keda confirma pa NoticiaCla.com.