Gerlien Croes sorprendi pa anuncio di retiro di Mike Eman como prome minister

ORANJESTAD – E anuncio inespera di Minister-President Mike Eman dialuna anochi, cu e lo entrega su cargo na 1 di januari 2027 como prome minister a genera reaccion inmediato den circulonan politico. Vice Minister-President y lider di partido FUTURO, Gerlien Croes, a confirma cu su partido a keda sorprendi cu e declaracion publica haci door Eman. Poco despues di e discurso historico di Mike Eman na Cas di Partido AVP, unda e a anuncia cu lo baha como Minister-President na comienso di 2027, Croes a publica un reaccion den su pagina di Facebook.

 “Di parti partido FUTURO nos ta informa cu nos ta altamente sorprendi pa publicacion haci den media un rato pasa riba declaracionnan haci door sr. Eman tocante entrega di su puesto como Prome Minister desde 1 di januari 2027,” Croes a scirbi.

FUTURO A KEDA SORPRENDI

E declaracion ta indica cu e socio di coalicion no tabata prepara pa e anuncio cu a domina e noticia nacional durante e anochi. Croes a agrega cu FUTURO ainda ta reuni mas informacion tocante e decision y cu partido lo comunica mas detaye cu comunidad ora tin mas claridad riba e situacion. “Na momento cu nos ricibi mas informacion nos lo por comunica mas cu comunidad,” e lider di FUTURO a expresa.Apesar di e sorpresa, Croes a enfatisa cu e trabounan di gobierno ta continua normalmente. “Mientrastanto trabounan ta continua pa nos Aruba,” e la conclui.

RETIRO COMO PROME MINISTER 

E reaccion di FUTURO ta bin despues cu Eman a anuncia cu e lo entrega liderazgo di AVP na september 2026 y posteriormente renuncia como Minister-President na 1 di januari 2027. E anuncio a marca un momento historico den politica arubano, pasobra ta pone fin na un periodo di 25 aña di liderazgo di Eman na cabez di AVP y varios periodo como lider di gobierno. Awor cu FUTURO a confirma publicamente cu e anuncio a bin como sorpresa, pregunta nan ta surgi riba con e transicion politico lo wordo maneha durante e siguiente seis luna y ken eventualmente lo ocupa e cargo mas halto den gobierno di Aruba.Te na momento di publica e articulo aki, no a wordo comunica mas detalle oficial tocante e proceso di sucesion ni e consultacionnan cu lo tuma luga dentro di coalicion.