Grupo di manifestante a kibra porta di parlamento y purba drenta

ORANJESTAD - Un grupo di 200 pa 300 persona a acumula dilanti entrada di parlamento diahuebs atardi, cu e peticion pa entrega un manifiesto (lesa e manifiesto aki) na presidente di parlamento. Lidernan sindical di entre otro TOPA, STA, SPA papiando como Frente Uni, tabata papia cu e multitud, ora cu dado momento a cuminsa un pushamento di esnan dilanti. E pushamento a bay di tal forma cu a logra kibra e portanan dilanti, incluyendo kozijn y glas, y a haci intento pa drenta paden. Pero pa sorpresa, a bin topa un grupo grandi di polis paden, cu a stroba e entrada di esnan cu kier a drenta parlamento. Mesora polis a forma un cadena humano, pa por a sigura cu ningun hende mas drenta e edificio. Mientrastanto paden, presidente di parlamento Marisol Lopez Tromp a informa esnan den sala, cu e tabata bon na altura di e situacion pafo, y cu e la ricibi e manifiesto (lesa e manifiesto aki), y cu e tin tur cos bou di control. Mientrastanto parlamento a continua cu e reunion, cu ta yegando su fase final.