Entrada di impuesto di Aruba ta subi, pero caha di gobierno ta fluctua

ORANJESTAD – Gobierno di Aruba a registra mas entrada di impuesto durante e prome cuatro lunanan di 2026 compara cu e mesun periodo na 2025. Principalmente impuesto riba ganashi, impuesto riba salario, BBO/BAVP y derecho di importacion a contribui na e aumento. Sinembargo, cifranan di Banco Central di Aruba ta mustra cu e posicion financiero di gobierno ta sigui variando considerablemente durante e aña.

APRIL

Den luna di april, gobierno a ricibi un total di Afl. 146 miyon na entrada, compara cu poco mas di Afl. 143 miyon den april di aña pasa. Entrada proveniente di impuesto a subi for di casi Afl. 137 miyon te cu alrededor di Afl. 140 miyon. E motor principal di e crecemiento ta continua siendo BBO y BAVP. Entrada for di e impuesto aki a aumenta for di casi Afl. 38 miyon na april 2025 te cu mas di Afl. 40 miyon na april di e aña aki.

IMPUESTO RIBA MERCANCIA 

Impuestonan riba mercancia tambe a registra crecemiento. Entrada total den e categoria aki a subi for di Afl. 34 miyon te cu Afl. 36 miyon. Specialmente derecho di importacion a sobresali, aumentando for di Afl. 20 miyon te cu Afl. 21,7 miyon. Esaki ta indica cu importacion di producto na Aruba ta mantene fuerte of incluso ta sigui creciendo.

ENTRADA DI ACCIJNS A KEDA STABIEL

Mientrastanto, entrada for di accijns riba gasolina a keda practicamente stabiel na alrededor di Afl. 6 miyon. Accijns riba tabaco, sin embargo, casi a duplica, subiendo for di cerca Afl. 1 miyon te cu casi Afl. 2 miyon. Impuestonan riba entrada y ganashi tambe a keda fuerte. Impuesto riba salario a aumenta for di mas cu Afl. 17 miyon te cu mas cu Afl. 19 miyon, mientras impuesto riba ganashi a mantene cerca di Afl. 14 miyon, permaneciendo un fuente importante di entrada pa gobierno.

POSICION DI CAHA TA CAMBIA CONSIDERABLEMENTE

Mas notable cu e crecemiento di entrada di impuesto ta e comportamiento di e caha di gobierno. E posicion bruto di liquidez a cuminsa e aña na mas cu Afl. 512 miyon na januari, pero despues a baha te cu Afl. 434 miyon na februari y casi Afl. 392 miyon na maart. Den april tabatin un recuperacion limita te cu Afl. 413 miyon, pero e nivel ainda ta casi Afl. 100 miyon mas abou cu na cuminsamento di e aña. Tambe e posicion netto di gobierno den sistema monetario a mustra fluctuacionnan fuerte. Esaki a subi for di solamente Afl. 5 miyon na januari te cu Afl. 83 miyon na februari y Afl. 126 miyon na maart, prome cu bolbe baha te cu Afl. 105 miyon na april.

CUADRO MIXTO

E cifranan ta pinta un cuadro mixto pa Aruba. Di un banda, entrada di impuesto ta beneficia di un economia fuerte, consumo halto y importacion continuo. Di otro banda, e fluctuacionnan grandi den posicion di liquidez ta indica cu e maneho di caha di gobierno ta sigui sensitivo na entrada y gasto grandi durante e transcurso di e aña.