NV ELMAR a nombra Eddy Oduber como su CEO nobo

ORANJESTAD – N.V. ELMAR a anuncia cu ingeniero Edward Harold “Eddy” Oduber a asumi oficialmente e cargo di Chief Executive Officer (CEO) for di 1 di juni 2026.

Oduber ta aporta casi 40 aña di experiencia den e sectornan di energia y industria, cu enfoke riba infrastructura critico, seguridad y confiabilidad operacional. E la studia Chemical Engineering na Worcester Polytechnic Institute y a ocupa diferente puesto di liderazgo tanto na Aruba como na exterior.

Mas recientemente, Oduber a sirbi como Terminal Operations Manager na Seaport Canaveral Oil Terminal na Florida. Anteriormente tambe el a lidera Terminal di Energia Aruba (TDEA) y a ocupa varios cargo gerencial den industria di refineria.

Presidente di Conseho di Supervision di ELMAR, Richard Frank, a indica cu Oduber ta combina experiencia tecnico, liderazgo ehecutivo y amplio conocemento di e sector energetico, cualidadnan cu lo yud’e guia e compania den su siguiente fase di crecemento, modernisacion y innovacion.

Como CEO, Oduber lo enfoca riba fortalece e confiabilidad di e sistema electrico, impulsa inversionnan strategico den infrastructura y contribui na e metanan di sostenibilidad di Aruba.

“Mi ta honra cu e oportunidad pa lidera ELMAR y sirbi Aruba pa medio di un organisacion esencial pa nos progreso y calidad di bida. Mi ta compromete pa sigui brinda un servicio confiabel y di calidad na nos comunidad,” Oduber a declara.

Cu su nombramento, ELMAR ta reafirma su compromiso cu un futuro energetico sostenibel y cu e entrega di coriente seguro y confiabel pa Aruba.